SARATOK, 19 Jun: Raban nembiak rebak baru lebih agi di pelilih tu diperansang anang ngelepaska peluang enggau nyadi kaban Soldadu Wataniah.
Kaban Kunsil Nengeri (ADUN) Krian Friday Belik madah, peluang nyadi kaban Soldadu Wataniah tu entara peneleba baru ke patut direbut raban nembiak ke baru apus sekula tauka sida ke benung nganti pemutus nampung pelajar.
“Nya alai aku meransang ngagai bala kitai Iban ti ba rumah panjai lebih agi bala nembiak kitai ke apin bisi pengawa tauka iya ke benung nganti pemutus nampung pelajar baru tau nguji minta masuk nyadi kaban Soldadu Wataniah di Saratok ditu,” ku iya.
Friday madah munyi nya pengudah tembu Pengerami Ngiling Bidai Hari Gawai Dayak enggau Pengari Rayat Tikas Kompeni Delta Saratok ba Kem Soldadu Wataniah Kompeni Delta Saratok di Jalai Roban Lama ditu, kemari.
Udah nya, ku Friday ari nyadi Soldadu Wataniah sida ke nembiak ulih bulih pengering ati sereta nerenak pemereti ati nyengkaum disiplin, pengeliat ati enggau narak sida enggau penemu pasal sistem pengelikun menua.
“Mayuh bendar penguntung enti kitai nyadi kaban tu (Soldadu Wataniah) laban siti nya tadi iya meri pengering ati sereta narak pemereti ati ba kitai empu baka ba sukut disiplin, pengeliat ati lalu pia mega nitih ke utai ke diajar bala jurulatih lebih agi bekaul enggau sistem pengelikun menua,” ku iya.
Pia mega Friday madah, soda ti deka masuk Soldadu Wataniah enda ibuh irau laban elaun endang bisi diungkupka ngagai sida nitihka penyuah sida nurun belatih.
“Enti sida nurun belatih sigi enda lebu laban bisi diberi elaun.
“Nya kebuah, aku ngarapka mayuh agi bala kitai Iban ba rumah panjai minta masuk Soldadu Wataniah awak ke pengawa terus ngerembai sereta ulih dikena mantu komuniti,” ku iya.
Nangkan ke nya, Friday madah diri deka terus meri sukung ari sukut belanja dikena Kem Soldadu Wataniah Kompeni Delta Saratok ngatur aktiviti ke bekaul.
Ungkup penemu, naka tu urung 70 lebih kaban soldadu ba Kem Soldadu Wataniah Kompeni Delta Saratok lalu ari penyampau nya semina enam iku aja bansa Iban.
Sama bisi datai ngulu pengerami nya bini Friday, Ani Isek sereta Pegawai Waran II, Kompeni Delta Saratok, Rasit Dang.-TVS
