KUCHING, 16 Jun: Rambai jaku ti dikena ngelai penyerakup menua Segulai Sejalai senutuk bendar enggau konsep ti dikemeratka stesyen TV lokal iya nya TVS ti mantaika program enggau penerang bekaul enggau budaya rayat pupu bansa di Sarawak.
Tuai Pegawai Eksekutif TVS, Rizal Zulkapli madahka, konsep nya sigi patut diterenak dalam ngeluarka konten kelimpah naka ulih nentuka pemanah enggau penyelai ti dikembuan rayat di nengeri tu ulih dipandangka sereta dikunsika ngagai rayat menua luar.
“Semua program ti dibantaika kami (TVS), nengah berita enggau semua ti dikunsika kami mesti nentuka nya ngarika rayat sereta etnik ke bisi di Sarawak.
“Kitai mega meruan mantaika budaya Sarawak sereta ngerembaika pekara tu ngagai bala mayuh di serata Malaysia.
“Pia mega, kami deka nentuka genap raban etnik, genap jaku, seni enggau adat di Sarawak ulih diperetika enggau ditemu semua orang di serata menua tu,” ku iya.
Iya mansutka jaku nya rambau dirandau pemberita ba Program Berkat Gawai ‘Get Together’ tauka TVS Berkat Gawai 2023 Segulai Sejalai ti diatur TVS ba sebuah hotel tebilang ditu, malam tadi.
Nangkan ke nya, Rizal mega nerangka, TVS deka terus mantaika bemacham program sereta ngayanka daya idup rayat pupu bansa di Sarawak.
Tu nyengkaum Program Konvoi Kembara Sarawak Merdeka nyerumba Pengerami Ngintu 60 Taun Sarawak Merdeka enggau Hari Malaysia.-TVS
