SARATOK, 16 Jun : Buah penemu dipansutka Menteri Dagang Temuai, Industri enggau Seni Pemerindang Kreatif, Datuk Seri Abdul Karim Rahman Hamzah ti deka numbuh ke agensi pengintu pengelantang artis di nengeri tu nerima timbal positif ari raban artis di Sarawak.
Siku ari penanyi tebilang asal ari Ensenggei Iban, Simunjan ke kala hitz enggau lagu Bajik Tuai, Leez Zwita ngarap ke enggau penumbuh agensi tu ila ulih ngemuntang ke agi bantu ari perintah ngagai raban artis di menua tu jemah.
“Ba penemu aku, tu perambu ke chukup manah lalu aku sigi nyukung penuh buah penemu dibantaika Menteri Dagang Temuai, Industri enggau Seni Kreatif, Datuk Seri Abdul Karim ti deka numbuh ke agensi pengintu pengelantang artis Sarawak.
“Ari penumbuh agensi baka tu ila dikearapka ulih nyaga pengelikun enggau meri pengelantang ngagai raban pemerindang tauka anak seni di Sarawak sereta ngarap ke mayuh agi inisiatif ulih diatur nengah agensi tu ila,” ku iya.
Udah nya, Chairman Gerempung Anak Seni Iban Malaysia (Pasima) Isa Lee madah, penumbuh agesi tu patut disambut enggau ati gaga ke pemaik seni pemerindang di Sarawak.
“Aku ngasai ke penemu iya tu (Abdul Karim) patut disukung kitai (artis) enggau ati ti chukup gaga enggau ati ti chukup gagit.
“Kelimpah ari nya aku deka meda lalu arap ke niat tauka perambu numbuhka ‘serakup khas’ tu ila ulih nyadi nyata awak ke pengelantang tauka pendiau pengelantang artis kitai di Sarawak tu lebih dijaga lebih dikemata ari sebedau tu,” ku iya.
Pia mega ku penemu penemu dibantaika siku agi penanyi Iban, bebansa Bidayuh iya nya Stephanie Johnny ngarapka agensi pengintu pengelantang artis nya ulih mantu raban artis ti beguna ke bantu.
“Nyadi ba penemu aku perambu perintah ti deka numbuh ke serakup khas dikena nyaga pengelantang bala artis tu endang sigi manah.
“Kebuah pia, laban kami raba artis tu endang begunaka perati sereta bantu ari piak bekaul lalu chara ti baka tu asai ba aku ulih mantu kami enggau lebih manah agi jemah,” ku iya.
Dulu agi ari tu, Abdul Karim maya dirandau pemberita nyerumba Pengerami Dialog Seni diatur Kaunsil Seni Sarawak (MSS) bisi nyebut Sarawak patut berunding numbuhka sebuah agensi khas enggau lengkas dikena ngemuntang perintah meri agih belanja tauka geran ngagai raban bekaul.
Pia mega, nengah agensi khas nya sida ulih meri bantu ngagai bala artis ke udah enda dapat agi merindang ketegal penanggul pengerai.
Ku iya, agensi nya endang bisi ditumbuh ba renggat perintah besai lalu sida chukup chakah bejalaika pengawa ngumpul royalti asil seni, taja pia sida bisi napi penanggul maya mayar royalti nya ngagai artis ke patut. -TVS
