SARATOK, 15 Jun: Semua penghulu lebih agi ba sitak Kunsil Nengeri (DUN) Krian diperansang bela ngenataika peminta nyukat Tanah Hak Adat Bansa Asal (NCR) perayat baruh sida ngagai Opis Residen.
Kaban Kunsil Nengeri (ADUN) Krian, Friday Belik madah pekara nya chukup beguna ngambika ngenap sida ke bisi tanah NCR ke apin disukat sama bela ampit tauka ungkup ari agih RM10 juta ke diberi perintah besai.
“Ba kitai di Krian ditu aku udah ngasuh bala Penghulu lebih agi ke apin kala ngenatai ke peminta tauka udah kala ngenatai ke peminta tang lalu bedau dikereja tau ngenatai peminta baru.
“Anang tinggal ngerebut peluang tu awak ke bela bulih pemaik ari agih belanja ke udah dikemendarka perintah besai nya,” ku iya.
Friday madah munyi nya maya bejadika Projek Bekal Ai Bukit Graviti enggau Agu Temuai ba Rumah Jimmy di Brayang Ulu ditu, kemari.
Berebak enggau nya, Friday ngarapka rayat di Krian ke bisi rikod tanah menua ke bedau disukat tau ngenataika peminta nengah Penghulu ngambika peminta dibai ngagai Opis Residen sebedau ti dikemujurka raban ari Opis Tanah enggau Survei.
Ngelansa pasal Projek Bekal Ai Bukit ke baru dipenyadi nya Friday madah nya sebagi ari chara dikena mutarka penanggul bekal ai beresi ke apin datai ba rumah panjai nya.
Ungkup penemu, Projek Bekal Ai Bukit ungkup Rumah Jimmy enggay Rumah Nyair udah digaga nengah chara beripai nguna agih belanja ari ADUN Krian sepenyampau RM100, 000. Projek bekal ai nya meri pemaik ngagai urung 44 buah rumah panjai.
Pia mega, Friday bisi ngagihka belanja sepenyampau RM10,000 ngagai JKKK Rumah Jimmy enggau RM5,000 ungkup Biro Indu sida. Penyampau agih belanja ke sebaka bela diagih ngagai JKKK Rumah Nyair enggau JKKK Rumah Tugau sereta Biro Indu sida.
Sama bisi datai nyempulang pejalai Friday, Pegawai Opis Pelilih Mit (SAO) Roban, Steve Miller, bala tuai opis perintah enggau bala tuai raban bansa ke besemak.- TVS
