KUCHING, 12 Jun: Urung 1440 nembiak ari empat buah sekula primari ba sitak Kunsil Nengeri (DUN) Satok nerima Skim Bantu Insuran Penabat.
Kaban Kunsil Nengeri (ADUN) Satok, Dato Ibrahim Baki madah, skim bantu insurans penabat ungkup nembiak ba sitak Satok，endang program kerejasama Dun Satok nengah Biro Pelajar Pampang N8 enggau bala kepala pengajar ba sitak nya.
Iya madah, penumbuh Skim Bantu Insuran Penabat nya asil ari penyiru enggau tanggungpengawa rama ngagai raban nembiak sekula primari ba sitak Satok.
Ku iya, insuran nya mega chukup beguna enggau meri pemaik laban deka nyaga penuh nyema nyadi penusah enda disadang ba sekula enggau luar sekula nyengkaum nyema nembiak nya dituntung penusah ba menua luar.
“Udah suah nyadi kes nembiak aksiden nyentuk ke bebadi nyawa tauka raya bakal.
“Nyadi ungkus pampas chukup besai diberi sida ari opis insuran tang ukai kitai ngajihka penusah tu nyadi tang nyema iya nyadi pampas (insuran) nya ulih ngelempungka tating belanja apai indai,” ku iya.
Entara empat buah sekula primari ke bisi nerima Skim Bantu Insuran Penabat tu iya nya Sekula Primari (SK) Combined 410 iku nembiak, SK Merpati Jepang (492), SK Rakyat Bolhassan (363) enggau SJK Chung Hua No.4 Kuching (175).
Ku iya, progam tu ukai semina ngaul raban ke ditatak aja tang ungkup semua nembiak ke nguna bantu, nyengkaum sida ari sekula di luar sitak Satok.
Tandu iya, polisi perintah Sarawak bungkur bantu ukai semina naka pekara pelajar tang ari agi dalam nyut nyentuk ke penusah rabat, chukup mayuh bantu baka Bantu Indai Beranak, Endowment Fund Sarawak (EFS) , Bantu Penusah Rabat dikena ngelempungka penusah rayat.-TVS
