KUCHING, 10 Jun: Menteri Pemansang Indu, Ruang Bilik enggau Komuniti, Datuk Seri Nancy Shukri madah pengawa nguna rambai jaku Segulai Sejalai siti kelai basa ti besai ngagai Sarawak.
Tu ngayanka Menteri Besai, Datuk Seri Anwar Ibrahim jampat nangkap lalu nemu beratika rambai jaku nya ulih mantu dikena negapka agi penyerakup rayat Malaysia.
“Pia mega engka ulih nyadi chunto ngagai menua bukai.
“Ulih dipeda chara Menteri Besai jampat beratika pekara tu nyadi siti chunto ke manah laban Segulai Sejalai kelai penyerakup, pengelantang pupu bansa.
“Nya alai kitai (Sarawak) berasai chukup temegah,” ku iya.
Nancy ke mega Kaban Parlimen Santubong mansutka penemu nya rambau Program Tilawah Al-Quran Renggat Pelilih Kuching diatur di Masjid Nurir Rahman Kampung Santubong ditu, kemari.
Dulu ari tu, Menteri Besai madah diri deka nguna rambai jaku Segulai Sejalai ba dedini program ke bekaul enggau penyerakup di serata Malaysia seriris enggau juluk negapka penyerakup rayat ti ngembuan mayuh pupu bansa di menua tu.-TVS
