SIBU, 11 Jun: Kaban Parlimen ari parti komponen Perintah Penyerakup kelimpah ari Gabungan Parti Sarawak (GPS), diansak negapka semangat sayauka nengeri lalu patut negika hak Sarawak ba Parlimen.
Sapit Premier Sarawak Dato Sri Dr Sim Kui Hian madah Sarawak begunaka agih belanja ari perintah besai dikena terus ngemansangka nengeri tu laban perintah nengeri kelalu lama nganti enti lebuh minta belanja ari perintah besai ngujungka nyau nguna wang nengeri empu.
Ku Dr Sim enda manding enti Kaban Parlimen nyebut Sarawak nengeri ti kaya sereta nadai begunaka belanja ari perintah besai dikena bejalaika projek-projek di nengeri tu.
”Kaban Parlimen patut nemu laban ke nyadi anak Sarawak, kita dipilih rayat Sarawak.
“Nyadi sida (rayat) nganjung kita ngagai Kuala Lumpur ngambi negika hak Sarawak lalu ukai mut-mut.
“Sida nyebut perintah Sarawak manah, bisi duit lalu nama kebuah patut nganti belanja ari Perintah Besai.
“Kami nganjung kita ke Semenanjung ngambika kita bejaku. Enti enda, kita patut bediri minta pilih ba din lalu enda ibuh bediri minta pilih ba Sarawak,” ku iya.
Dr Sim ke mega Presiden Parti Sa’ati Rayat Sarawak (SUPP) madah munyi nya rambau Pengerami Ngiling Bidai 2023 diatur SUPP Pampang Bawang Assan ditu, kemari.
Pia mega, Dr Sim nyemetak madah Sarawak ngembuan hak minta belanja ari perintah besai.
Ku terang iya, perintah besai patut adil lebuh ngagihka belanja ngagai genap nengeri.-TVS
