BETONG, 10 Jun: Komuniti Dayak diperansang besaup ngeluarka pemayuh Pua Kumbu ngena teknologi baru ngambika ulih nangkup peminta penguna ari serata dunya ti bela rinduka pekayan nya.
Sapit Premier Sarawak Datuk Amar Douglas Uggah Embas madah diatu deka ngiga Pua Kumbu chukup tusah laban produk nya chukup laku tang nadai mayuh orang ti agi ngeluarka asil tenun nya.
Beduduk ari nya, iya madah dalam taun tu sida merambu deka ngatur sebengkah seminar pekayan Dayak (Iban) ngambika pengawa ngasilka pekayan asal nya seruran bisi orang nampung.
“Enda lama agi tauka dalam taun tu kitai (perintah) deka ngatur seminar pasal pekayan Dayak.
“Tuju seminar tu dikena kitai berundingka chara ngaga pekayan Dayak, ngetanka penulin iya awakka seruran dikerindu ukai semina ba raban peranak Sarawak aja tang mega ungkup serata dunya.
“Nya alai, diatu aku andal nengah pemisi kereban teknologi baru, IT enggau internet kitai ulih nangkup peminta nya ungkup serata dunya,” ku iya.
Uggah ke mega Kaban Kunsil Nengeri (ADUN) Bukit Saban mansutka penemu nya rambau bejadika Pengerami Niti Daun Gawai Dayak Renggat Bagi Menua Betong 2023 diatur ditu, sehari tu tadi.
Dulu ari nya, Uggah madah pekayan Dayak ngembuan makit ke chukup besai baka Pua Kumbu nyengkaum kereban ngepan baka rawai, sugu tinggi enggau ke bukai.
Nya alai, ku iya ari seminar ti deka diatur tu ila dikearap deka ngerandang jalai enggau muka mayuh agi peluang ditemu raban ke endang ngemeranka pengawa nyual produk pekayan Dayak.-TVS
