KUCHING, 10 Jun: Raban orang bumai bekebun ba menua tu patut ngubah chara berunding lalu peratika chara dalam sektor betanam betupi ti ukai agi semina ungkup neruska pengidup tauka terunda-runda enggau chara lama.
Raban tu patut ngalih ngagai chara nyadika pekara nya pengawa dagang seraya mantu dalam negapka sukut pengelikun pemakai menua, ku Menteri Industri Pemakai, Komoditi enggau Pemansang Wilayah, Dato Sri Dr Stephen Rundi Utom.
Ku Rundi, pemar besai ditapi iya nya nyadika aktiviti agro betanam betupi sebuah industri tauka pekara ti teguh dikena ngubah runding raban nya.
“Siti chara dikena kitai ngenyemakka diri enggau mensia kayuh ba luar din iya nya nengah Opis Broadcasting lalu diatu mega kitai udah bisi media rama.
“Nengah sebarang chara, anang muai jam kita ba Facebook tauka sebarang pelantar media rama ke bukai ti semina dikena begosip (randau ruai) aja.
“Nyema kita bisi peneleba tauka siku orang bekunsi mai kita ngagai pekara ke baru ti ulih meri pemaik ngagai rayat kitai lebih agi raban bumai ti diau ba menua pesisir, tau padah,” ku iya.
Iya mansutka jaku nya rambau Pengerami Ngabang Gawai Waifm ba Entepan Kerita RTM ditu, kemari.
Berebak enggau nya, ku Rundi ejensi ba baruh opis menteri iya agi enda chukup meri penerang enggau narak penemu raban bumai pekebun ngambi ngalih ngagai pekara ke lebih moden sereta meri penguntung.
Tandu iya, pengawa nya begunaka kerejasama ari semua raban nyengkaum opis broadcasting dalam mantaika pemujur orang bumai enggau pekebun mit ti ngaul diri dalam pengawa betanam betupi ti meri penguntung ke besai.
Program nya nguna konsep pengerami Ngelaluka Pengabang Gawai Dayak ti nyadi pelantar dikena bejalaika program servis komuniti seraya ngerapitka kaul entara ejensi perintah enggau komuniti.-TVS
