KUALA LUMPUR, 9 Jun: Rambai jaku Segulai Sejalai endang lama dikena komuniti Dayak, lebih agi komuniti Iban dalam ngatur program enggau lebuh bejalaika pengawa dikena ngempuru seraya ngedutka kaul enggau pangan diri.
Nya alai, ku Kaban Parlimen Sri Aman, Dato Sri Doris Sophia Brodi, komuniti Iban patut berasai temegah laban leka jaku nya udah diangkat nyadi rambai jaku penyerakup ti deka disebut dedini endur ba selampur menua tu.
Tandu iya, pekara nya mega mandangka Sarawak terus diangkat nyadi model tauka chunto nengeri ti ngembuan penyerakup ke tegap di Malaysia.
“Nyadi leka jaku segulai sejalai tu suah dikena kitai lebih ngatur pengerami di Sarawak, lebih agi komuniti Iban.
“Tu ketegal rambai jaku nya sigi ngayanka penyerakup kitai di Sarawak, lebih agi Sarawak nyadi model penyerakup ba menua tu.
“Ba penemu aku, pekara tu manah amat dikerembaika perintah penyerakup ti bepelasarka konsep Madani,” ku iya rambau dirandau pemberita TVS ba Begunan Parlimen, kemari.
Nangkan ke nya, ku Doris ngarapka rambai jaku nya ulih ngembing rayat pupu bansa di Malaysia terus beserakup, besaup nuju pemansang awakka semua orang ngasaika pengelantang ba baruh perintah besai ti dipegai Perintah Penyerakup.
‘Kitai chukup temegah laban di Sarawak bisi lebih 30 etnik datai ari mayuh macham asal, pengarap tang kitai ulih idup begulai sama nadai penanggul.
“Sigi amat Segulai Sejalai mih kitai semua. Aku chukup temegah ati,”ku iya.
Udah nya, Doris ngelalau rayat Malaysia patut nerima, nguna manah sereta meretika senentang rambai jaku Segulai Sejalai nya ngambika penyerakup terus idup, tegap ungkup pemanah rayat sereta pemaik menua tu.-TVS
