KUCHING, 8 Jun: Pemenang Anugerah Grammy, Gipsy Kings enggau Tonino Baliardo antara pemuzik ti deka ngerichahka panggau Rainforest World Music Festival (RWMF) 2023 kena 23 nyentuk 25 June tu.
Berambaika jaku ‘Reflections’, RWMF 2023 deka ngemataka lebih 20 segmen pemerindang ti dibantaika pengari 12 menua mungkur empat menua besai di dunya tu.
Antara pemuzik antarabansa ti deka ngambi bagi iya nya raban semilan iku ari Tanzania, Safi Theatre, ti ngempung muzik ‘ngoma’ tradisional (dram enggau tanda) disempulang akrobatik.
Udah nya, Rastak ari Iran deka mandangka muzik rayat Iran ngundan tiun kontemporari, Fasylive ari Maldives deka mantaika muzik asil buah penemu ari pangka gelumbang tasik Maldives.
Nangkan ke nya, Afriquoi ari United Kingdom deka ngayanka tiun Afrika berentak elektronik lalu nya disadang nyadi siti muzik ke ngerindu ati mensia mayuh.
Udah nya, pengawa beperindang deka dirichahka Chatusram ari India, Rizal Hadi & Folk ari Indonesia, Ethno Thai Fusion Sound Band ari Thailand, Kumi Masunaga ari Jipun enggau Syed Ibrahim ari Singapore.
RWMF taun tu mega deka ngemataka pengatur program betimpai mua baka sebedau menua dipangka pandemik COVID-19 taun 2019.
Beli tiket RWMF taun tu tumu ba pelasar Klook, iya nya ejen tiket rasmi RWMF 2023.
Pia mega, penerang silik bekaul enggau raban pemuzik enggau informasyen tiket ulih dipeda ba laman web rasmi RWMF di http://rwmf.net. -TVS
