KUCHING, 8 Jun: Leka jaku Iban, Segulai Sejalai deka diangkat nyadi rambai jaku penyerakup ungkup selampur menua, ku Menteri Besai Datuk Seri Anwar Ibrahim.
Iya madah diri tepaut ati enggau genteran jaku nya ti nyadi rambai jaku dikena ngintu  Gawai Dayak renggat nasional ke digulu Menteri Besai empu malam tadi.
“Reti nya dedini endur aku bejalai, maya bejaku pasal gempung, penyerakup enggau kerejasama, nyadi aku deka nyebut Segulai Sejalai,” ku iya maya bejaku ba pengerami nya.
Tuai Pemegai Menua (TYT), Nengeri Sarawak Tun Pehin Sri Abdul Taib Mahmud enggau bini iya, Toh Puan Raghad Kurdi Taib bela nyadi temua dipebasa ba pengerami nya kelimpah digulu Premier Sarawak, Datuk Patinggi Tan Sri Abang Johari Tun Openg.
Sama datai Sapit Menteri Besai Datuk Seri Fadillah Yusof, Sapit Premier Sarawak Datuk Amar Douglas Uggah Embas sereta sekeda bala menteri perintah besai enggau nengeri.
Anwar madah, udah datai maya rayat lebih agi ba Semenanjung Malaysia belajar ari Sarawak baka ni penyerakup pupu bansa dikena ngemansangka menua.
Kenu ku iya, Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah suah ngerah beguna amat semangat beserakup, lalu anang ngangkaika isu-isu ke ulih mechahka rayat.
“Tu pekara ke nyata diatu. Sarawak ba sekeda bidang jauh nyulu dibanding enggau nengeri-nengeri bukai,” ku iya. – TVS
