PUSA, 4 Jun: Premier Sarawak Datuk Patinggi Tan Sri Abang Johari Tun Openg madahka, perintah sarawak deka bejalaika pansik ngasilka garam enggau gula apong nengah Kaunsil Pemansang Daun Apong enggau Mulung.
Ku iya, penumbuh kaunsil nya dikena bejalaika pansik saintifik bekaul enggau mulung sereta apong.
“Nya kebuah kitai mesti bejalaika pansik. Pansik ke baru dipejalaika ngaul industri mulung enggau apong.
“Lebih saintifik. Nya kebuah ba Kampung Teh Mukah ke alai uras mulung ke dipansik ulih mansutka gis methane.
“Gis methane tu ulih dikena kitai berapi. Nya alai diatu aku nguji dulu mansutka tu ba mukah. Kitai nguji dulu gis dikena berapi,”ku iya.
Iya madah munyi nya rambau Pengawa Gawai Raya Renggat Batang Lupar ba Dataran Tandang Sari Pelilih Pusa, kemari.
Kelimpah ari nya, ku Abang Johari pansik nya dipejalaika dikena ngelakuka produk nya ngagai menua luar seraya dikena nambahka penatai pemsi nengeri tu.
“Tu deka nambahka industri ti bepelasarka mulung.
“Kedua iya nya garam apong. Garam apong tu siti produk organik.
“Garam tu manah. Nya alai kitai nguna sida bala saintis baka ni deka ngasilka garam apong,”ku iya.
Nangkan ke nya, ku iya pengawa pansik mansutka getah apong mega dipejalaika dikena ngasilka barang mata ke baru.-TVS
