KAPIT, 4 Jun: Kapit diatu dipeda benung ba tikas tranformasyen ari sukut infrastruktur enggau sosio ekonomi lalu mayuh pemansang nya benung dikemujur kenyau ari beberapa taun ke udah.
Menteri Kereja Raya Dato Sri Alexander Nanta Linggi madahka pengawa mai pemansang ngagai pelilih nya ukai pekara ke mudah berindik ari pemesai menua kapit nyau deka sama enggau pemesai nengeri pahang sereta pekara ke diguna rayat di menua pesisir nya ke bebida.
“Pemisi jalai darat ke Kapit nganti jalai ai udah mayuh mantu ngubah gaya sosio ekonomi ditu.
“Aktiviti ekonomi majak ranchak lalu jalai mega majak sekut.
“Aku meda ari sukut positif ke alai, tu mandangka infrastruktur jalai alun ke baka tu meri mayuh empas positif ngagai rayat,”ku iya.
Nanta ke mega Kaban Parlimen Kapit madah munyi nya rambau Pengerami Rumah Terbuka Gawai Dayak 2023 Parlimen Kapit beserimbai penemuai rasmi Sapit Menteri Besai Datuk Seri Dr Ahmad Zahid Hamidi ba Dewan Suarah Kapit kena Hari Enam tu tadi.
Nangkan ke nya, ku Nanta pekara tu enda ulih dipejalaika enti nadai kaul ti rat entara perintah nengeri enggau perintah besai.
Ku iya, mayuh agi pemansang deka dikemujur lebih agi di menua pesisir seriran enggau juluk Malaysia Madani.
“Entara inisiatif ke dipejalaika iya nya ngaga jalai ngelayang Sungai Batang Rajang ba utara tebing Sungai Batang Rajang.
“Inisiatif tu dipejalaika laban kami nemu pemar ke ditapi rayat ti enda ulih mindah pansut enggau tama ngagai genturung pendiau sida ketegal nadai agi servis bot ekspres, kelimpah ari bot kediri empu,” ku iya.
Nanta mega pechaya pengawa jalai baru ulih mantu ngurangka penyekut ke nyadi ba jalai besai ke Kapit, enti sema pekara nya udah tembu ila.
Berebak enggau nya, Nanta madah diri deka mantaika perambu nya ngagai Opis Menteri Pemansang Genturung Pendiau enggau Wilayah (KKDW) enggau Agensi Pemansang Ulu Rajang (URDA).-TVS
