KUCHING, 16 Mei: Aum Kunsil Nengeri (DUN) Sarawak sehari tu tadi udah selubang penemu ngemendarka Rang Undang-Undang (RUU) Kaunsil Krafjari Sarawak 2023.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, RUU nya dijangka deka ngenataika asil ke besai ngagai rayat Sarawak.
“Kraf iya nya siti industri ti ngenataika asil ke besai ngagai sida ti diau di menua pesisir.
“Enti suba kraf engka nadai diberi perati ke berat ari perintah tang diatu berindik ari industri dagang temuai makin lama makin ngerembai,” ku iya.
Iya mansutka jaku nya rambau ba aum media pengudah mantaika Rang Undang-Undang (RUU) Kaunsil Kraf Sarawak 2023 ba Aum Dun Sarawak ke -19, sehari tu tadi.
Berindik ari nya, RUU nya deka meri kuing tuju ke nyata ngagai Kaunsil Kraf Sarawak (SCC) dalam mantu nyungkak industri nya di nengeri tu.
Abdul Karim madahka, sebedau tu kaunsil nya nadai ngembuan sebarang lumpar ordinan dalam nentuka mayuh bengkah pekara nyengkaum ungkup agih belanja.
“Pengelama 26 taun…kitai semina bisi Kaunsil Kraf, agih mimit aja.
“Komiti enggau sida ti nyaga Kaunsil Kraf tu sigi nadai mayuh. Nyadi baka ni sida deka ngubah tauka ngatur perambu latih sida ti bisi pengelandik ba menua pesisir,” ku iya.
RUU Kaunsil Krafjari Sarawak 2023 nerima sukung penuh ari bala Kaban Kunsil Nengeri nyengkaum raban penyakal.-TVS
