KUALA LUMPUR, 13 Mei: Opis Menteri Penyerakup Menua nyaran nempa rikod nasional nengah pengawa ngempuruka urung 1,000 iku mandangka pekayan etnik pupu bansa nyerumba Pengerami Minggu Penyerakup 2023 (SMP 2023) renggat nasional ti deka diatur ba Kuching, Sarawak berengkah 20 Mei tu.
Sekretari Unit Polisi enggau Kaul Entarabansa Opis Menteri Penyerakup Menua Mohamad Sobri Mat Daud madah, program nya sebagi ari aktiviti dikena ngintu pengerami nya.
“Kitai deka nusun sida berintai ba Jematan Darul Hana lalu kitai deka nguji nempa siti rikod ke empai kala digaga sebedau tu,” ku iya maya nyadi temuai segmen Ruang Bicara ke betopik “Sambutan Minggu Perpaduan 2023” dikeluarka Bernama TV malam tadi.
Iya madah pengerami nya mungkur eksibisyen ari mayuh bengkah ejensi enggau opis menteri baka Opis Menteri Dagang Dalam Menua enggau Kos Pengidup sereta Opis Menteri Komunikasi enggau Digital.
“Kita mega deka bisi siti slot penerang iya nya kitai mulaika kenang sejarah menua merdeka. Opis Muzium Menua mega deka bisi siti slot mandangka main asal. Nyadi, rebak biak tau nguji bemacham main asal,” ku iya.
Yang di-Pertuan Agong Al-Sultan Abdullah Ri’ayatuddin Al Mustafa Billah Shah mega ditaga deka bejadika pengawa muka SMP 2023 renggat nasional nya ba Waterfront Kuching, Sarawak kena 21 Mei.
Berebak enggau nya, Menteri Besai Datuk Seri Anwar Ibrahim sereta raban Kabinet bela datai ngulu pengawa nya. – TVS
