SINGAPORE, 13 Mei: Singapore ngenuku ke tiga kes di menua nya dirampit igi penyakit Zika lalu semua kes nya nyengkaum sekalika sida ti diau enggau gawa ba Kovan, sitak ke bepalan ba mengeri Hougang.
“Dua iku orang benung ngenat diri ba rumah nyau belinsur gerai lalu siku agi benung diperubat ba sepital. Nadai siku ari sida diripotka betubuh bisi,” ku Opis Menteri Pengerai (MOH) enggau Ejensi Rampa Menua Nasional (NEA) republik nya ba sebengkah penerang ke dibantai Hari Lima.
Zika, penyakit ke dibai nyamuk, entara kelai kena rampit baka tabin, gelata, pedis buku tulang enggau isi, pedis pala sereta konjunktivitis.
Taja pia, mayuh orang ti kena rampit enda nemu diri.
Taja iya jarang nyadi, igi penyakit Zika ti ngerampit orang betubuh bisi ulih ngeruga pemansang untak anak dalam kandung sereta ulih ngujungka anak ada tachat baka mit pala tauka dikumbai ‘microcephaly’.
Sebaka enggau igi penyakit denggi, kena rampit igi penyakit Zika kebendar dibai nyamuk Aedes. – TVS
