KUCHING, 1 Mei: Pengerami Kaamatan di Sarawak ke diatur keterubah iya taun tu diperati ngerapit agi tanggam kaul pupu bansa.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, inisiatif Gerempung Main Asal Kadazan Dusun (KDCA) Sarawak ngatur pengerami nya endang patut dibasa.
“Pengerami tu mandangka penyerakup komuniti ba Sabah enggau Sarawak laban budaya sereta seni iya endang nyelai sereta ngembuan reti ke chukup besai.
“Baka ke udah ditemu kitai Sabah enggau Sarawak diuan pupu bansa, pengarap enggau budaya tang tetap idup enggau lantang. Tu patut diangkat enggau dijaga ngambika seni budaya tu enda lenyau diserunyut jeman,” ku iya.
Iya madah munyi nya maya Pengerami Bejadika enggau Mungkal Pengerami Kaamatan 2023 renggat KDCA Sarawak ditu, malam tadi.
Snowdan mega madah, pengerami baka nya entara chara dikena matak temuai datai ke Sarawak enggau Sabah.
KDCA Sarawak ngembuan kaban peturun Kadazan, Dusun, Murut enggau Rungus ke diau mendam, gawa sereta belajar ba Sarawak.
Rambai jaku Pengerami Kaamatan taun tu iya nya ‘Kaamatan Membudayakan Perpaduan’.
Ungkup penemu, Pengerami Kaamatan tauka Tadau Kaamatan sebengkah pengerami ke diintu kenyau ari kelia dikena ngingatka sejarah ‘Bombazan’ iya nya bebasaka semangat padi dirami sepanjai bulan Mei lalu pengerami besai iya diintu kena 30 enggau 31 Mei ninting taun.- TVS
