KUCHING, 29 April: Raban indu bansa Dayak patut terus negapka ekonomi, pelajar enggau komuniti, ku Menteri Industri Pemakai, Komoditi enggau Pemansang Wilayah Sarawak Dato Sri Dr. Stephen Rundi Utom.
Jaku lalau nya patut disukung enggau pemesai guna raban nya mandangka ulah ke badas sereta nyadi chuan teladan orang bukai.
Iya mega madah genap pengawa tauka ulah ke dikereja raban indu Dayak deka nyereminka pendiau bansa sida empu.
Berebak enggau nya, Dr Stephen Rundi mega minta raban indu Dayak patut bebasaka pangan diri dikena negapka penyerakup dalam komuniti.
“Anang Loba-Loba. Ulah nya enda badas.”
“Kitai patut seruran bebasa enggau belajar ari orang ke udah tebalan lalu patut bekunsika penemu awakka kitai sebaka enggau lebih maju ari bansa bukai,” ku iya.
Dr. Stephen Rundi madah munyi nya maya Pengerami Makai Lemai Sarakup Indu Dayak Sarawak (SIDS) Fellowship di sebuah hotel tebilang ditu, kemari.
Sama bisi datai Sapit Menteri Nembiak, Lumba enggau Pemansang Dagang Dato Gerald Rentap Jabu, Kaban Kunsil Nengeri (ADUN) Pakan Tan Sri William Mawan Anak Ikom, Penyanding Penemu Sarakup Indu Dayak Sarawak Tan Sri Empiang Jabu enggau Presiden SIDS Dato Ir. Alice Jawan Empaling.
Pengerami nya diatur nyerumba Aum Besai Tiap 3 Taun SIDS ke digulu kaban ari semua pampang SIDS serata Sarawak.
Ba pengerami nya mega, agih belanja sepenyampau RM115,000 diberi dikena ngemansangka pekara pelajar anak Dayak ba menua ulu.
Bela dipenyadika maya nya bup sejarah pasal penumbuh SIDS.-TVS
