KUCHING, 24 April: Sarawak berupai ngerikodka penambah penatai temuai ungkup suku keterubah taun tu iya nya bisi nambah 200 peratus dibanding timpuh ke sama taun siti ke udah.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, ungkup timpuh tiga bulan keterubah taun tu Sarawak udah nerima lebih 300,000 temuai enggau asil ari dagang temuai tu lebih RM800 juta.
“Ungkup bulan March, temuai datai ke Sarawak ungkup taun 2023 iya nya 323,960.53.
“Timpuh ke sama ungkup 2022 iya nya semina 86,881 lalu bisi penambah sepenyampau 272.88 peratus.
“Ari penyampau nya, temuai menua luar ke datai ngagai Sarawak ba taun 2023 iya nya 168,627 enti dibanding ba taun 2022, semina 3,959.
“Lalu nya dipeda berupai nambah sepenyampau 4,159.33 peratus. Udah nya, temuai dalam menua ungkup bulan March taun 2023 iya nya 155,333.
“Taun 2022 sebedau tu iya nya 82,922. Bisi nambah sepenyampau 87.32 peratus. Sektor dagang temuai taun tu udah ngasilka sepenyampau RM 817.75 juta.
“Timpuh ke sebaka ba taun 2022 iya nya RM 195.54 juta. Bisi niki sepenyampau 318.20 peratus ari bulan Januari ke bulan March lalu pekara tu beguna amat laban kitai endang bisi saran ungkup 2023 iya nya tiga juta temuai.
“Aku mega enda iran nyema penatai temuai kitu ulih manggai empat juta,” ku iya maya dirandau pemberita nyerumba Pengerami Ngelaluka Pengabang Hari Raya Aidilfitri ba rumah iya empu di Jalai Astana kena Hari Minggu.
Karim mega madah diri andal, entara pekara ke balat nyungkak penatai bala temuai ke Sarawak iya nya laban bisi ngatur program ninting minggu enggau bulan sereta konvensyen dagang temuai ke dikemujur raban bekaul lebih agi Kaunsil Dagang Temuai Sarawak (STB) enggau Biro Konvensyen Sarawak (SCB).
Semua aktiviti nya ku iya udah mujur matak raban temuai raun ke Sarawak.
Sama bisi datai ngabang Hari Raya ngagai rumah Karim iya nya Menteri Kereja Raya Datuk Seri Alexander Nanta Linggi enggau Sapit Menteri Industri Pemakai, Komoditi enggau Pemansang Wilayah Sarawak, Martin Ben. -TVS
