KUCHING, 15 April: Komiti Pengatur Trafik Mengeri Sarawak (SUTMaC) udah setuju ngemasukka pelin pemansang arung khas bas dalam polisi perambu mengeri dikena ngemuntangka pemansang arung khas ungkup bas di mengeri-mengeri besai di Sarawak dudi hari.
Kenu ku Menteri Pengangkut Sarawak Dato Sri Lee Kim Shin, atur trafik mengeri ke sistematik beguna amat dikena nentuka pemindah mensia mayuh likun, berurun enggau sikar sereta nyaga rampa menua.
“SUTMaC deka beratika isu trafik begulai enggau deka madah ngagai perintah langgur program penuh enggau sejalai sereta projek nyengkaum inisiatif dikena mutarka isu nya enggau lebih meruan.
“SUTMAC mega deka meda ukai semina timbal pelin timpuh pandak tang mega strategi timpuh panjai dikena mutarka penanggul trafik mengeri ba Sarawak,” ku iya.
Iya madha munyi pengudah betuaika Aum Komiti Pengatur Trafik Mengeri Sarawak di Kuching kemari.
Bela bisi ngulu aum nya Tuai Opis enggau Pegawai Perintah ari Opis Menteri enggau Ejensi sereta Dewan Bandaraya Kuching Utara (DBKU) enggau Opis Kereja Raya (JKR) Sarawak ke udah diberi pangku pengawa ngatur trafik mengeri nyengkaum Residen di semua bagi menua ba Sarawak.
Entara pekara ke bisi dikerandau ba aum nya baka meri perati ngagai isu ngatur projek enggau program ke dipejalaika nengah bemacham ejensi bekaul trafik mengeri baka operasyen palan ngerah enggau ngatur pejalai trafik.
Berebak enggau nya, komiti nya mega bisi mendingka taklimat ari Sarawak Metro Sdn Bhd pasal perampa penuh projek Transit Aliran Ringan (ART) sereta Sistem Pengangkut Mengeri Kuching (KUTS).
Tandu Kim Shin, perintah nengeri enggau perintah besai ngembuan tanggungpengawa nyaga pejalai trafik enggau ngaga perengkaguna jalai ke ditujah.
“Ejensi tu deka gawa nitihka skop pengawa diri nitihka agenda sida empu.
“SUTMaC deka nyadi pelasar ngagai semua raban ke bekaul duduk begulai enggau mutarka isu-isu berat ti ngachau pejalai trafik mengeri enggau pejalai perengka pengangkut,” ku iya.- TVS
