KUCHING, 8 April: Jaguh Terejun Menua, Datuk Pandelela Rinong Pamg udah dipadu nyadi Kaban Kaunsil Yayasan Volunteer Siswa (YSS), iya nya sebuah yayasan dikena ngelakuka pengawa volunteer ba raban siswa.
Nengah sebengkah penerang dibantai ba laman facebook iya, Pandelela mantaika pengaga ati laban udah diberi peluang lalu besemaya deka mangku pengawa nya enggau penuh penyiru.
“Aku berasai gaga ati nyadi sebagi ari yss, lalu aku deka mangku pengawa tu enggau penuh penyiru,” ku iya.
Pandelela asal ari Kampung Jugan, Bau siku ari atlit Malaysia ke pemadu nyulut.
Apin lama kena 31 Januari tu tadi iya nerima gelar Olahragawati Nasional ungkup Anugerah Lumba Menua (ASN) 2021 ti disuaka Menteri Besai, Datuk Seri Anwar Ibrahim.
Gelar ASN nya, keempat kali udah diterima Pandelela nangkan taun 2011, 2012 enggau 2015.
Udah nya, iya kala nempa sejarah ba Lumba Olimpik London 2012 sereta nyadi indu ari menua Malaysia keterubah menang midul ba main terejun, iya nya midul engkeraju ba main terejun 10 meter peninggi.
Nangkan ke nya, Pandelela mega kala menang midul pirak ba Lumba Olimpik Rio 2016 nengah main terejun bepasang 10 meter begulai enggau Cheong Jun Hoong.
Kelimpah nyapai mayuh pemujur ba pengawa lumba, Pandelela dikelala ketegal ulah iya ti seruran gerah jari meri tulung mata duit.
Iya suah ngambi bagi ba bemacham program pengintu pengelantang, nyengkaum ngumpul turu ungkup raban orang tasah bah ba Sarawak enggau ngelakuka pengawa ngintu rampa menua.
Nya alai, nengah pengawa nyiri iya nyadi Kaban Kaunsil Direktor YSS, Pandelela andal deka ulih mantu ngangkatka agi pengawa volunteer ba raban siswa di Malaysia.-TVS
