KUCHING, 6 April: Raban ke rindu begagaka barang kraf jari, ngepan Iban, enggau produk pemakai diperansang patut gagit agi ngulu program ti ulih narak penemu baru dikena ngangkatka produk ti ditempa sida.
Ku Pengempu Sarawak Paperbeads, Teresa Suli Noel madah nengah program baka nya sida ulih meda, ninga sereta beratika entara pekara ke patut dikemanah ngambi ke semua bansa produk ke ditempa sida dudi hari lebih manah sereta ngembuan kualiti ke tinggi.
Iya madahka ambika chunto, program eksibisyen enggau kus ti bisi meri penerang seraya ngajar senentang ngepan Iban.
Sida ke datai ulih betanya enggau macha penerang ke bisi dibantaika ba program nya ti tau nambahka penemu enggau pemereti lebih agi senentang pesaka asal ke jarang dipeda kemaya hari tu.
“Siti ari chunto ke pemadu manah iya nya ngambi bagi dalam Simposium Ngepan Iban (SNI).
“Penyereta deka diberi penerang enggau garis lalau senentang pengawa bekenaka Ngepan Iban lebuh maya bepekit enggau enyi nyema ngulu pengerami,” ku iya.
Teresa nerangka nengah program baka nya, penyereta ulih betemu enggau raban tebangkar ti udah tebalan ngereja pengawa, seraya nunda singkang sida ti udah nyapai mayuh pemujur sekalika dalam menua tu tauka tikas antarabansa.
“Bisi kaban aku ke benama Sandine Bennidect Ikang siku tebangkar ngaga tauka nenun Pua Kumbu.
“Iya mayuh ngajar orang ti bisi pengerindu betenun sereta ngaga kraf jari ke bukai. Sandine mega nyadi penyanding penemu Raban Pengelandik Jari (RPJ) Bintulu, “ tandu iya.
Sebedau tu, Teresa ke mega siku penengkebang fesyen ti ngangkatka guna manik nerangka manik entara barang ke mayuh dikena lebuh begagaka marik, kain, gelang sereta krafjari ke bukai sereta ngembuan rega ke tinggi.
Berebak enggau nya, iya ngelalau orang ke bisi nyimpan marik lama mesti nyaga manah barang nya awak ke semampai manah dipeda sereta meruan dipeda nyentuk ke jemah ila.
Nitihka rikod, produk kraf jari ti digaga bepelasarka manik ngembuan rega ti tinggi lebuh dijual, lalu pengelandik nusuk manik mesti dikerembai sereta ditampung rebak dudi. – TVS
