KUCHING, 2 April: Parti Pesaka Bumiputera Bersatu (PBB) deka ngatur aum besai beserimbai enggau pengawa Ngintu 60 Taun Sarawak Merdeka.
Premier Sarawak ke mega Presiden PBB Datuk Patinggi Tan Sri Abang Johari Tun Openg madah, aum besai nya deka diatur ba tiga zon di Sarawak mungkur zon selatan, tengah enggau utara.
“Aum besai tu betuju meri penerang bekaul enggau pemansang pemadu baru senentang pekara ke udah dijapai parti ungkup kaban (parti) enggau nerang ngagai sida kuing tuju parti ari sukut semua bidang, lebih agi bekaul enggau pejalai polisi Pelin Strategi Pemansang Pasca COVID-19 (PCDS) 2030,” ku iya.
Abang Johari madah munyi nya ba sebengkah aum media pengudah betuaika Aum Ketiga Supreme Kaunsil Parti Pesaka Bumiputera Bersatu (PBB), lemai kemari.
Berebak enggau nya, iya madah, kebuah aum besai nya diatur ba endur ke bebida beduduk ari ekonomi ke udah ngalih ngagai ekonomi baru ti nyangka bedau ditemu enggau bedau bisi ba sitak bukai.
“Kebuah pia laban ekonomi baru Sarawak deka ngaul teknologi tebilang enggau baka ke udah disemaya aku deka madahka siti teknologi baru datai ari Sarawak lalu deka ngubah dimensi ekonomi ukai semina ba Sarawak tang nya nyangka ngerembai ngagai sitak bukai ba dunya tu,” ku iya.
Udah nya, Abang Johari bisi nangkan raban Menteri Perintah Besai ti deka ngatur pejalai gawa ke Sarawak ungkup tuju ngemujurka projek dipinta madah tumu ngagai Perintah Sarawak.
Ku iya, pekara nya beguna amat ngambika raban ari perintah nengeri ulih mantu ngatur pejalai sida.
“Tu betuju ngemudahka pejalai sida ngabas lalu pegawai ari perintah nengeri patut nemu tuju pengawa ke deka digaga sida, nyamai kitai ngatur baka ke udah ditagaka perintah nengeri,” ku iya.
Kenu ku Abang Johari, Menteri Besai mega bisi ngelalau bala menteri perintah besai nitihka atur perintah negeri Sarawak awak ke ulih begulai enggau ketuai nengeri tu ngatur enggau ngemujurka projek-projek ke digaga ba Sarawak.-TVS
