LIMBANG, 31 Mac: Projek Pelaman Bemain Limbang beungkus RM15 juta ke nyadi sebengkah agi palan besai endur main ekstrem di utara Sarawak dipelaba tembu tengan Julai taun tu.
Sapit Menteri Industri Pemakai, Komoditi enggau Pemansang Wilayah Sarawak (M-FICORD), Datuk Dr Abdul Rahman Ismail madah, projek dibaruh agih Perintah Besai nengah Opis Landskap Menua ditaga tembu tumu ari ke patut.
Projek tu diatu udah digaga manggai 87 peratus dibanding 63 peratus enti nitihka taga ditetap.
Ku tandu iya, bemacham main ulih diatur ba pelilih nya enti palan tu udah tembu ila lalu tu deka nyadi palan dagang temuai di utara Sarawak.
“Enti nitihka haribulan asal projek nya disadang tembu kena 14 September taun tu, tang aku tadi nerima jaku jamin ari kunteriktor madah projek nya ulih tembu tumu,” ku iya maya dirandau TVS maya pejalai gawa ke taba Projek Pemansang Pelaman Bemain Limbang ditu, kemari.
Sama bisi datai Sapit Residen Limbang, Jamalie Busri.
Ku iya, projek tu beguna amat dikena nambahka palan ngelantang ati, bemain enggau lumba ekstrem baka drag race, lumba motosikal kapchai enggau ke bukai iya nya entara main ke pemadu dikerindu raban nembiak.
Pengawa ngatur bemacham main tu ku iya, ukai semina ulih ngelakuka Limbang nyadi palan besai lumba ekstrem ba utara Sarawak tang mega meransang raban nembiak masuk aktiviti ti bisi meri pemaik.
“Aku andal pengudah tembu palan tu deka meri pendiau ke baru ngagai palan ngelantang ati ba Limbang lalu nya ulih digaga nyadi siti agi palan ke ulih matak temuai ke Limbang.
“Aku ngarapka sida ke bekaul enggau projek tu ulih bebendar agi nentuka projek ulih tembu dikena nangkup peminta perayat di Limbang,” ku iya. – TVS
