KUCHING, 30 Mac: Industri dagang temuai entara sektor ti mayuh meri asil ngagai ekonomi Sarawak.
Beduduk enggau nya, Opis Menteri Dagang Temuai, Industri kreatif enggau Seni Pemerindang, Sarawak Tourism Board (STB), ejensi perintah ke bekaul, Gerempung Ukai Dikuasa Perintah (NGO) sereta pemekuh sektor dagang temuai terus bebendar ngatur program ti tau matak temuai datai ke Sarawak.
Chairman Sarawak Tourism Board (STB), Dennis Ngau madahka, semua program ke diatur nya bisi penau matak temuai datai ke nengeri tu nyengkaum ari menua luar.
“Beduduk ari penyampau temuai ke datai majak nambah, semua pemekuh industri deka ngasaika penguntung baka hotel, perengka pengangkut, restoran tauka kedai makai, palan alai ngelantangka ati enggau ke bukai.
“Nyadi, temuai ke datai kitu mai duit, bebelanja lalu tu meri penguntung ngagai semua pengemeran industri dagang temuai,” ku iya.
Dennis ke mega Kaban Kunsil Nengeri (ADUN) Telang Usan meransang semua rayat Sarawak, lebih agi komuniti di menua pesisir nyukung polisi perintah ti deka ngemansangka sektor dagang temuai, mesti kemerah lebuh nyambut penatai sereta meri servis ke pemadu manah ngagai bala temuai.
“Lebuh sida ngasaika peneleba ke manah, sida tepantup ati, sida pulai lalu nusui pekara nya ngagai bala bukai. Sida mega ulih nemuai baru mai kaban belayan ke bukai datai ke Sarawak.
Aku pechaya nengah chara betusui ke peneleba nya pengawa bedajaka palan dagang temuai lebih mudah dikerembaika. Nya mih aku meransang semua kitai rayat Sarawak besaup nyadika nengeri kitai menua ke manah alai nemuai,” tandu iya rambau ditelefon pengarang berita TVS lebuh Hari Tiga.
Nitihka ripot, Opis Menteri Dagang Temuai, Industri Kreatif enggau Seni Pemerindang nyaran penyampau tiga juta iku temuai ke Sarawak dalam taun tu.
Sapit Menteri ke nguasa opis nya, Datuk Sebastian Ting Chiew Yew pechaya saran nya ulih dijapai bepelasarka rikod penyampau penatai temuai diatu.- TVS
