KUCHING, 30 Mac: Pengawa ngintu kampung siti ari polisi ti dikemeratka perintah sekalika perintah besai enggau perintah nengeri kelimpah ari ekonomi gadung, kuasa ulih dikemaru, sereta menatika pemeruan rampa menua.
Direktor Kanan Palan Instrumentasi Meteorologi enggau Sains Atmosfera, Opis Meteorologi Malaysia Ambun Dindang madahka pekara nya endang manah, lebih agi tangkup pengawa ngintu enggau nyaga kampung ukai semina dilempaika ba perintah aja, tang mega ngaul semua renggat.
Iya madahka komuniti ti mendam ba menua pesisir mesti nemu senentang guna sida nyukung polisi perintah ti ngemeratka pengawa ngintu kampung ngambi ke pemanah sereta penguntung ari kampung ulih terus diasaika sida.
“Nyadi ngintu kampung enggau babas sigi beguna laban semua gis rumah gadung baka karbon dioksida ti dilepas ngagai atmosfera diserap pun kayu enggau utai tumbuh ke bisi dalam kampung.
“Nitihka pansik kitai di Malaysia lebih agi Sarawak ngembuan kampung ti besai lalu nya kebuah semua perintah di serata dunya diperansang ngetanka pemeruan kampung ke mantu ngurangka isu pengangat dunya sereta isu ubah klimet,” ku iya.
Berebak enggau nya, Ambun nerangka perintah mega ngemeratka polisi ngadungka kandang endur mengeri ke nyerangkung nanam pun kayu.
“Perintah endang meransang kandang endur ba mengeri ditanam enggau pun kayu dikena mantu ngurangka pengangat laban pun kayu ukai semina mantu nyerap gis karbon dioksida tang mega ngelepaska gis oksigen ti dikena jelu enggau mensia enseput,” tandu iya rambau mansutka penerang senentang pengawa ngintu kampung ngagai pemberi TVS empai lama.
Nitihka ripot, perintah Sarawak diatu benung chakah deka ngemansangka kuasa ulih dikemaru, kuasa gadung ke bukai sereta hidrogen.
Berindik enggau nya, Universiti Malaysia Sarawak (UNIMAS) diperansang bekerejasama enggau perintah Sarawak ngemansangka kuasa ulih dikemaru ti ulih diguna dalam industri pengangkut ke lebih gadung, beresi, likun sereta meruan.
Sebedau tu, Menteri Pengangkut Sarawak, Dato Sri Lee Kim Shin bisi nerima penemuai basa ari Mandal Canselor UNIMAS, Profesor Datuk Dr Mohamad Kadim Suaidi enggau raban deligit iya di Petra Jaya. – TVS
