SARATOK, 30 Mac: Pekit angkat berat ditaga deka diatur ba Betong lalu pekit tinju di Sri Aman ungkup Pekit Lumba Malaysia (SUKMA) 2024.
Menteri Nembiak, Lumba enggau Main sereta Pemansang Orang Dagang Sarawak, Datuk Seri Abdul Karim Rahman Hamzah madah pengawa milih sesebengkah palan endur ngatur SUKMA bepanggai ba mayuh pekara lebih agi bekaul enggau perengkaguna sereta endur atlit bemalam.
Berindik ari nya, ku iya pekit SUKMA nadai diatur ba pelilih Saratok laban perengkaguna lumba ke bisi ba pelilih nya bedau nyapai standard nasional.
“Di Betong nyangka deka nguna dewan endur pekit angkat berat.
“Saratok pan agi dalam pegai Betong nyadi Betong udah disetuju deka endur ngatur pekit SUKMA, abis nadai dua iti bansa main kelimpah ari angkat berat.
“Chara kitai milih palan endur ngatur SUKMA bepanggai ba mayuh pekara, siti ari nya baka sukut perengka enggau palan atlit bemalam.
“Taja perengkaguna nya udah bisi ba Saratok tang ungkup tikas nasional perengkaguna lumba ba Saratok baka dewan, padang enggau ke bukai apin datai ba tikas ti standard,” ku iya.
Karim ke mega Menteri Dagang Temuai, Industri Kreatif enggau Seni Pemerindang madah munyi nya pengudah tembu Bejadi Program Jerayawara Bubur Lambuk Saberkas 2023 Renggat Nengeri Sarawak ba Masjid Al-Muhtadin ditu, ensana.
Berebak enggau nya, Karim meransang mensia mayuh di Saratok ti deka ngemataka pekit main enggau lumba ke bukai maya nya ila ulih nurun ke Sri Aman tauka Sibu.
“Nyadi orang Saratok enti sida enda ulih ke Kuching meri sukung maya SUKMA nya ila sida tau ke ke Betong mega ke Sri Aman enggau Sibu ni bagi ke semak laban pekit tinju tu mayuh bagi menua minta diatur ba endur sida tang kitai udah ngaga pemutus pekit tinju diatur ba Sri Aman,” ku iya.
Sama bisi datai Sekretari Besai Saberkas ke mega Kaban Kunsil Nengeri (ADUN) Daro Safiee Ahmad, ADUN Krian Friday Belik, ADUN Kalaka Mohamad Duri, ADUN Tanjong Datu Azizul Annuar Adenan enggau ke bukai.-TVS
