LUBOK ANTU, 26 Mac: Siku lelaki betu ba mua enggau jari pengudah rumah ke alai iya diau nyembuah di Rumah Lintong, Nanga Kesit ditu dituntung penusah angus pagi kemari.
Nitihka penerang ari Balai Bomba enggau Penyah Penusah (BBP) Betong madah sida nerima kangau tasah nya urung pukul 2.50 pagi.
Beduduk ari kangau nya, sida terus ngesah palan penusah nya. Lebuh datai sida meda amat bisi penusah angus nyadi nuntung sebuah rumah nyembuah dua ringkat ke udah angus 90 peratus.
“Maya penusah nyadi, bisi tiga iku orang benung ba dalam rumah iya nya dua indu enggau siku lelaki beumur entara 30 nyentuk 60 taun sereta mujur ngidupka diri.
“Tudah ke ngempu rumah tu, Kunsil anak Asun betu ba mua enggau jari lalu udah dianjung sida serumah berubat ngagai klinik ke besemak,” ku penerang nya.
Nangkan ke nya, raban bomba ngelawa rumah ke angus tu nengah jematan gantung lalu ngerara api ngena ai sungai ke semak.
“Nengah chara RECEO, pengawa ngerara api dipejalaika ngena dua salur ai enggau 300 kaki pam angkut ke nguna ai ari sungai (Lemanak).
“Api mujur dirara tang rumah tudah diperati udah angus lengis,” ku tandu penerang nya.
Raban BBP Betong ke ngesah penusah tu betuaika PBK II, Muhd Abang Fhazil enggau digulu dua pegawai kaban PPgB Vincent Baling Yabi enggau PBK I, Henry Jugah sereta dibantu dua iku PBS Lubok Antu.-TVS
