BINTANGOR, 24 Mac: Kompleks Lumba Bintangor patut diteriki enggau lengkas, ku Kaban Kunsil Nengeri (ADUN) Meradong Datuk Ding Kuong Hiing.
Ku iya, pekara nya patut diberi perati beduduk ari pendiau kompleks nya nyau baka tembawai sereta enda likun diguna.
Entara utai ke patut dirumban ku iya, ngemanah trek endur belanda sereta padang main bol.
“Minggu siti ke udah aku bisi nurun ke Kuching lalu bisi betemu enggau Sekretari Nembiak enggau Lumba Sarawak, berita manah, Bintangor tauka Kompleks Lumba Bintangor bisi dipasuk ba rintai lumur empat dalam tusun atur pengawa tengan penggal, nyangka berengkah digaga taun baru,” ku iya maya dirandau media ditu, kemari.
Iya madah, pengawa neriki perengkaguna nya mesti digaga laban endur tu deka nyadi palan keterubah dipilih alai ngatur bemacham program komuniti nyengkaum pengawa main enggau lumba.
Ku iya, Bintangor begunaka perengkaguna lumba moden dikena nempa mayuh agi raban atlit ke bepenau diangkat ngagai tikas ke lebih tinggi.
“Aku suba mantaika penanggul tu (neriki kompleks lumba) nyau deka ninting kali Aum Kunsil Nengeri (DUN).
“Nya alai, aku ngarapka atur lengkas ulih dipejalaika dikena ngemanah agi perengkaguna tu seraya nyendiaka kereban ke lebih menyana ngagai peranak Bintangor ungkup aktiviti ngelantang ke ati,” ku iya. – TVS
