KUCHING, 24 Mac: Penyangkai Kapal Senari ti deka disikap enggau Vessel Traffic Management System (VTMS) ditaga tembu bulan Mei 2023.
Menteri Infrastruktur enggau Pemansang Penyangkai Kapal Datuk Amar Douglas Uggah Embas madahka penembu projek nya mantu ngemudahka pengawa matau kapal ti masuk ke palan nya.
“Projek VTMS ke beungkus RM30 Juta dikena matau penama kapal ti datai ke penyangkai kapal ditu.
“Nengah sistem tu kitai ulih matau pejalai kapal penyauh 40 kilometer ari tasik,” ku iya madah rambau nemuai ke Lembaga Pelabuhan Kuching (KPA) lebuh Hari Lima.
Uggah ke mega Sapit Premier Sarawak nerangka pemisi sistem nya ngemudahka pengawa ngatur, ngelancharka pejalai kapal sereta aktiviti bukai ke bisi dipejalaika ba palan nya.
Bepelasarka rikod, perintah udah ngungkupka penyampau RM70 Juta ngagai KPA dikena negapka operasyen ke mungkur kren, masang VTMS ti beungkus RM30 juta enggau hab ngengkah kerita (Vehicle Yard) ti beungkus RM50 juta.
Rambau nemuai kia, Uggah enggau raban iya diberi penerang senentang VTMS enggau matau pemansang projek ngaga hab ngengkah kerita.
Nangkan ke nya, iya ngabas seraya matau pemansang projek Jematan Sejingkat-Samarahan berindik ari projek nya mesti tembu sebedau hab ngengkah kerita ba Penyangkai Kapal Senari tembu.- TVS
