KOTA SAMARAHAN, 14 Mac: Kerejasama penuh entara raban pemenggi tanah ke bekaul deka ngemuntangka agi pengawa ngemujurka sesebengkah projek.
Sapit Premier Sarawak, Datuk Amar Awang Tengah Ali Hasan madah, perintah ngambi tanah dikena bejalaika projek pemansang ti ulih meri penguntung.
Ku iya, projek pemansang nya digaga dikena nentuka perengkaguna pemun ulih disedia ke pengelantang rayat ari sukut sosioekonomi, pelajar enggau pengerai.
“Patut nentuka perengkaguna pemun digaga nyadi sebagi ari pengawa kitai dikena ngemansangka ekonomi, nyungkak penatai pemisi rayat lalu ari nya sida deka ulih ngemansangka tanah diri baka ngaul pengawa dagang.
“Enti nya dibantah tentu kami tusah (ngatur pemansang),” ku iya.
Iya mansutka pekara nya ba Pengawa Nyerahka Chek Pampas Projek-Projek di bagi menua Samarahan diatur ba Dewan Suarah Kota Samarahan, kemari.
Ba pengawa nya, bisi 111 iku pemenggi tanah ti bekaul enggau projek ngaga enggau neriki jalai ba bagi menua Samarahan nerima pampas sepenyampau RM20 juta.-TVS
