LUBOK ANTU, 11 Mac: Perayat ke suah nengah jalai batang Sebeliau-Nanga Bangai, Ulu Lemanak ditu minta saup raban bekaul neriki sekeda jalai ti balat rusak, putus, tekerap sereta kena lamun tanah tusur ketegal penyadi hari ke suah ujan.
Penanggul jalai nya enda tau enda diputarka enggau lengkas laban enda lama agi kena 19 March tu raban nembiak deka mupuk mulaika diri baru ngagai buding sekula.
Maya dirandau TVS pagi tadi, siku pengari ari Nanga Bangai Ulu Lemanak, Tuai Rumah Thomas Ringkai madahka jalai ke balat rusak ketegal tanah tusur tu nyadi ba sitak simpang Patoh ngagai Tinting Brunei.
“Aku ngarapka raban bekaul datai ngesah mutarka penusah kami ke diau begenturung ba Batang Lemanak tu enggau lengkas laban semina nya aja batang jalai ke ditengah kami menua tu.
“Pia mega enda lama agi kami deka nganjung bala anak pulai sekula baka ngagai Sekula Primari (SK) Ulu Lemanak enggau ngagai Sekula Sekondari (SMK) Engkilili,” ku iya.
Nya alai, Thomas mega minta raban bekaul mutarka penanggul arus telefon ke tejanggal ketegal tiang pemanchar ti nyau deka tumbang ketegal tanah tusur sereta nadai bekal karan kenyau dua minggu ke udah.
Penusah tanah tusur tu mega bisi diripotka nyadi ba jalai batang nuju ke Rumah Utum, Nanga Uyau, jalai ba sitak antara Blaie enggau Mato nyengkaum jalai ba antara Kekan enggau Tinting Brunei.
Naka ke diatu, penyampau pengani ke diau ba rumah panjai Nanga Uyau bisi 20 pintu enda ulih pansut ngagai sitak bukai.-TVS
