DEBAK, 2 Mac: Peranak ke mendam ba kandang endur baruh sereta mudah ampuh dilalau seruran nengkira diri enggau nitihka gerah ti dipansutka ejensi perintah ke bekaul, lebih agi enti nyema dipinta mindah ngagai Palan Pengenduh (PPS).
Sapit Premier Sarawak, Datuk Amar Douglas Uggah Embas madahka tuju gerah nya dipansutka dikena nentuka pengelikun rayat ke tebunsa ketegal penusah bah dikenatika enggau manah.
“Pekara ti dikemeratka perintah diatu pengelikun rayat ke napi penusah bah. Nya kebuah semua ejensi perintah ke bekaul dipinta nyikap diri lebih tumu nyengkaum nyendiaka PPS baka ba Dewan Millenia ditu,” ku iya madah.
Uggah ke mega Chairman Komiti Penyangga Penusah Ngenyit Nengeri (JPBN) Sarawak nerangka naka ke diatu bisi enam PPS dibuka di Sarawak kenyau ari 1 Mac enggau iya ngarapka penyampau nya enda nambah.
Iya madahka semua opis enggau ejensi perintah baka Komiti Penyangga Penusah Ngenyit Pelilih enggau Bagi Menua besaup bejalaika pengawa ngambi ke pengelantang rayat ti tebunsa sereta ngenduh ba PPS seruran dijaga manah.
‘Taja pan gaya ba PPS tu enda sebaka ba rumah tang kitai senaka ulih nentuka sida ke tebunsa chukup pemakai, ai irup enggau diberi servis perubat ti nyema bisi beguna.
“Pia mega, kitai udah minta Opis Pengintu Pengelantang Komuniti (JKM) ngaga langgur baka ni deka nentuka anak mit baru ada ke bisi ba PPS bulih bekal tusu formula ke betul,” tandu iya.
Iya mansutka jaku nya rambau dirandau pengarang berita pengudah ngabas PPS Dewan Millenia lebuh Hari Empat.
Sama bisi datai iya nya Residen Bagi Menua Betong Richard Michael Abunawas enggau Pegawai Pelilih (DO) Betong Alfred Geling Ason. – TVS
