SARATOK, 2 Mac: Penanggul nyengkubang pendam ke suah nyadi ba dalam komuniti Iban mesti diputarka nengah chara ke nemban sereta lengkas.
Kaban Kunsil Nengeri (ADUN) Krian, Friday Belik madahka Tuai Peranak enggau Tuai Komuniti (KMKK) mega patut ngesan tangkup pengawa beratika senentang penanggul nya ngambi ke enda terus nyadi.
“Penanggul nyengkubang pendam tu udah suah nyadi lebih agi ba pendam bansa kitai Iban sebedau tu.
“Kitai enda nemu nama tuju orang ke nyengkubang pendam tu sekalika sida tu enchuri orang ke udah mati tauka ngiga barang berega ti dibai orang ke udah mati tauka ke bukai,” ku iya madah.
Friday nerangka enti nyema penanggul nya enda diputar manah iya ulih ngeruga pengelantang rama laban pendam ke disengkubang nya ngaul kaban belayan ke semak.
Nangkan ke nya, iya ngelalau semua tuai komuniti lebih agi ba rumah panjai numbuhka siti komiti ba baruh Komiti Pemansang enggau Pengelikun Genturung Pendiau (JKKK) dikena nyaga pendam Iban.
“Nya alai sigi patut tetiap pendam kitai Iban tu tadi enti ulih numbuhka siti komiti awak ke ngaga atur dikena kitai nyaga tauka beratika jalai ti engkeman dikena mutarka penanggul nyengkubang pendam tu.
“Penanggul tu ngaul komuniti kitai sereta mesti diputarka nengah kerejasama ti rat enda ngira renggat,” tandu iya.
Iya munyi nya lebuh dipinta meri timbal bekaul enggau Agih Belanja RM1.5 bilion pengudah tembu Aum Kaban Komiti (AJK) Parti Demokratik Progresif (PDP) ba Palan Servis DUN Krian, lebuh Hari Dua.
Sebedau tu, TVS bisi bekunsika berita senentang 11 iti pendam di Sungai Selemas Bintangor disengkubang orang ke enda mereti empai lama. – TVS
