MUKAH, 19 Feb: Pekara pelajar terus dikenatika di sitak Kunsil Nengeri (DUN) Tellian nengah inisiatif numbuhka Biro Pelajar Mukah.
Nampung berita UKAS, Kaban Kunsil Nengeri (ADUN) Tellian, Royston Valentine madahka biro nya ti nyerangkung pelajar enggau kokurikulum udah dilancharka kena bulan September taun siti nyin suba.
“Nembiak ke nyulut dalam pelajar ari ruang bilik ke kurang bepenatai pemisi, kitai nguji mantu sida nampung pelajar ba renggat ke lebih tinggi.
“Kitai udah bisi komiti ti bejalaika tanggungpengawa nisih sereta milih ni bagi nembiak ke patut diberi bantu enggau sukung ari kitai,” ku iya.
Royston nerangka biro nya mega merambu deka nyendiaka program khas kelas tuisyen ti pechuma ngagai nembiak ke patut dibantu.
“Di kandang menua pesisir, kitai deka nguji ngaluska dulu program meri tuisyen pechuma ngagai nembiak,” tandu iya.
Berebak enggau nya, Royston madahka pekara nya deka dibai dalam aum entara Gerempung Apai Indai enggau Pengajar (PIBG) enggau pengatur sekula laban nya siti ari pengawa dikena ngemansangka nembiak di menua pesisir.
Ba pengerembai bukai, iya nerangka senentang Ulu Baoh begunaka siti dewan ke besai alai ngatur mayuh macham program.
“Sepenyampau RM400,000 udah dikemendarka dikena ngaga dewan Ulu Baoh sereta taba projek tu udah ditemu alai,” ku iya.
Iya mansutka jaku rambau Program Makai Lemai Gerempung Apai Indai enggau Pengajar (PIBG) Sekula Primari (SK) Ulu Baoh di Dewan Kaunselor Lambong, SK Baoh Ulu ensanus.
Dalam program nya, Royston udah meri geran Projek Mit Menua (MRP) sepenyampau RM10,000 ngagai PIBG SK Ulu Baoh.-TVS
