BINTANGOR, 18 Feb: Semua rumah panjai tauka genturung pendiau ba serata Sarawak diperansang numbuhka komiti pengelikun pendam dibaruh Komiti Pemansang enggau Pengelikun Genturung Pendiau (JKKK) diri empu.
Pekara tu chukup beguna ngambika kes nyengkubang pendam ke suah nyadi ba menua tu ulih ditagang, ku Penghulu Abas Banyi.
Tuai raban bansa ke nyaga sitak Meradong nya meransang JKKK di nengeri tu patut numbuhka Komiti Pengelikun Pendam awakka ulih nyaga enggau matau pengelikun pendam ba genturung pendiau diri.
Ku iya, pekara tu enda tau enda digaga ngambika penusah ke baka tu nadai agi nyadi dudi hari.
“Nyadi aku arapka semua kitai di serata Sarawak numbuhka komiti dikena nyaga pendam, ngambika utai (pendam) tu ulih likun lalu nadai agi nyadi penusah ke baka tu dudi hari.
“Utai tu udah nyadi ba kami, nadai ku enggau mih. Arapka menua bukai dudi hari numbuhka komiti ngichaka pekara tu nadai nyadi ba sida,” ku iya maya dirandau pengari TVS lebuh Hari Lima.
Berebak enggau nya, Penghulu Abas ngarapka pengari rayat ke bekaul, berundingka atur baka ari sukut belanja meri bantu dikena sida ke udah ditunting penusah ngemanah baru pendam ke udah rusak.
Pia mega, buah penemu ti minta numbuhka Komiti Pengelikun Pendam nya dibaruh JKKK nerima sukung ari Tuai Rumah Lawai Sedao ari Sungai Sian.
Tuju penumbuh komiti nya chukup manah ngambika semua pendam ulih likun enggau enda disengkubang orang sengapa.
“Au, enti ulih komiti nya patut ditumbuh ukai semina ba menua kami ditu aja tang patut ditumbuh ba semua endur ba Sarawak.
“Tu ulih nyeliahka pendam kitai beresi sereta diseliahka ari penusah kena kachau orang tauka ulah nyengkubang pendam tu,” ku iya.
Ungkup penemu ba pun minggu tu tadi, bisi 11 iti pendam ba pendam lama Sungai Selemas nya dipenggi kunsi empat buah menua iya nya Teluk Batu, Stubah, Muara Bunut enggau Sungai Sian dipeda rusak bekau disengkubang raban ti enda mereti dipelaba deka ngiga barang ke berega.
Beduduk ari nya, Balai Polis Meradong udah ngenuku bisi nerima ripot polis bekaul enggau penusah nya lalu kes nyengkubang pendam nya benung dipansik.-TVS
