LUNDU, 17 Feb: Siti sitak mengeri baru diperambu deka dikemansang ba Opar beduduk ari sitak nya agi nadai ngembuan opis kaunsil.
Perambu nya dibantaika Kaban Kunsil Nengeri (ADUN) Opar, Billy Sujang ti deka meda sitak nya bisi ikon baru.
Kenu ku iya ikon baru nya dipelaba deka mandangka identiti bansa Selakor enggau Lara ke semina bisi ba Lundu.
“Perintah Sarawak komited ngemansnagka genap sitak ba nengeri ti nyengkaum sitak DUN Opar lalu pekara nya udah dikerandauka enggau Mini Lab Greater Kuching Coordinated Development Agency (GKCDA),” ku iya.
Iya madah munyi nya maya dirandau pemberita pengudah Bengkel Greater Kuching Coordinated Development Agency (GKCDA) di Salcra Bajo Training Centre, Lundu kena Hari Empat.
“Kitai mega deka muka palan rekreasyen enggau palan mai asal ti mandangka identiti komuniti ke bisi ba pelilih Lundu lebih agi ba sitak Opar, ti tebal agi bansa Bidayuh.
“Bansa bukai ke mega bisi ditu baka Iban, Melayu enggau China. Nya alai, kitai deka meda ikon nya ila mandangka tu endang sitak kitai,” ku iya.
Taja pia, Billy nadai nyemetak madahka timpuh kemaya pengawa ke diperambu nya tang iya andal perintah Sarawak enda ngelaungka Opar.
“Pemansang bepanggai ngagai tuai ke ngiring GKCDA. Naka tu, Datu Ik Pahon Joyik nyadi Tuai Pegawai Eksekutif GKCDA ti ngiring semua kitai taja aku ADUN Opar, aku mega patut mendingka jaku iya,” ku iya.
Sama bisi datai Tuai Pegawai Eksekutif GKCDA, Datu Ik Pahon Joyik enggau Sekretari Politik Premier Sarawak, Niponi Undek.-TVS
