KUCHING, 14 Feb: Jaku peransang ari siku tuai politik perintah ti meransang mensia mayuh bela bekenaka pekayan ti ngundan motif tauka chura identiti bansa iban ninting Hari Satu nerima timbal ke positif lebih agi raban orang dagang.
Ku siku pedagang pekayan motif borneo, Rowena Cliffton madahka buah penemu nya chukup manah laban ulih mantu ngangkatka agi identiti bansa Iban seraya nyungkak ekonomi raban pedagang fesyen enggau produk krafjari.
Ukai semina nya aja, pengawa baka nya mega ulih nyadi pelasar dikena ngerembaika agi pemanah pekayan asal bansa Iban ngagai renggat ke lebih tinggi.
“Chukup manah penemu Datuk Gerald Rentap Jabu senentang atur ngasuh ngena pekayan bermotif iban tauka pekayan borneo motif tu ninting Hari Satu.
“Utai tu ukai semina ngangkatka identiti bansa Iban tang mega nyungkak ekonomi pedagang,” ku iya rambau ditelefon pembrita TVS sehari tu tadi.
Iya ke mega pemungkal chap dagang Rowena meransang mensia mayuh bela nyukung langgur penemu ngena pekayan motif Iban seraya ngemeranka nya.
Kebuah pia, sukung ari penguna beguna nyadika peransang ngagai pedagang pekayan motif Iban ransing agi deka ngasilka produk ke lebih manah sereta bekualiti.
Nya alai, komuniti iban patut temegah ngayanka pemanah pekayan bansa diri lebih agi rebak biak kemaya hari tu.
Ku iya, siti chara dikena ngerembai enggau ngangkatka budaya Iban iya nya nengah pengawa dagang baka fesyen, kraf enggau ke bukai.
“Diatu pekayan borneo motif Iban udah diterima ba renggat antarabansa. Nya kebuah, kitai empu patut terus nyukung pelantar tu awak ke ulih ngemansangka identiti kitai lalu dipeda komuniti ba luar din,” ku iya.- TVS
