BETONG, 11 Feb: Kaban Parlimen Betong, Dr Richard Rapu setuju enggau perambu ti dibantaika Premier Sarawak Datuk Patinggi Tan Sri Abang Johari Tun Openg bekaul enggau skim gaji baru ungkup orang gawa perintah.
Ku iya, pemanah skim gaji ke baru nya ila enti dipejalai ulih matak lebih mayuh agi orang ke udah abis belajar ari universti, STPM tauka palan pelajar ke bukai minta gawa perintah.
“Sigi manah laban nya ulih narit lebih mayuh agi orang ke udah lepas sekula baik nya ari Universiti udah bulih degree enggau ke bukai tauka iya ti udah abis peresa STPM.
“Nyadi nya sigi pekara ke manah laban nya ulih matak orang ke pandai-pandai masuk gawa perintah ba menua kitai Sarawak ditu,” ku iya.
Iya mansutka timbal nya maya dirandau pengari TVS pengudah bejadika Program Apresiasi Penyulut Nembiak Sesi 2022-2023 SK Paku Central ba diwan sekula nya, kemari.
Nangkan ke nya, Dr Richard mega nyukung buah penemu dipansutka Sekretari Besai Gempung Parti Sarawak (GPS), Datuk Seri Alexander Nanta Linggi ti ngarapka perambu skim gaji baru nya dipejalai nitihka sistem kuota.
“Kita sama nemu baka kitai di Sarawak bisi bemacham pupu raban bansa enggau etnik sereta bemacham penatai nyadi ari sukut kuota nya endang pekara ke manah tang kekadang lebih ngagai merit mega nyadi enti kededua nya tadi ulih digembar ari sukut merit ari sukut kuota, awaka semua etnik kitai ditu sama-sama bisi peluang lalu ampit gawa perintah.
“Nya alai enti iya bisi kuota disegulaika enggau merit orang ke endang patut tauka raban profesional nya ba penemu aku sigi manah,” ku tandu iya.
Kelimpah ari nya, Dr Richard mega ngarapka skim gaji baru nya ulih ngurangka tating belanja raban oran gawa perintah di sarawak.
“Enti perambu tu nyadi lumur satu tentu skim gaji lebih manah ari ke udah setikas enggau orang ke gawa ba sektor peribit iya ti nyendiaka skim gaji ke tinggi lalu lain agi ari sektor perintah.
“Nyadi nyema utai nya nyadi lalu enggau skim gaji ke udah dikemanahka ari diatu…utai nya manah,” ku iya.-TVS
