KUCHING, 11 Feb: Premier Sarawak Datuk Patinggi Tan Sri Abang Johari Tun Openg nyemetak madahka Chukai Rega Barang Nengeri (SST) ba tayar deka dikinsil.
Berita manah nya dipansutka iya maya Pengerami Makai Lemai Taun Baru China diatur Serakup Kaunsil Dagang enggau Industri China Sarawak (ACCCIS) ditu, malam tadi.
Ku iya, pekara nya deka dipejalaika nengah Pengintu Chukai Rega Barang Nengeri sereta madah perintah Sarawak mega deka ngiga formula ngatur tayar ke udah dikena ngambi enda ngeruga rampa menua.
Berebak enggau nya, iya minta Kaunsil Dagang China enggau sektor peribit numbuhka puku teknologi dikena nginjin baru tayar ke udah dikena awak ulih dikena ngetar jalai raya ba nengeri tu.
“Getah tayar tu ulih digaga nyadi palet nyema iya pechah lalu palet nya kebendar ulih dikena ngaga jalai raya, enti ulih aku ngiga chara ngatur tayar ke udah dikena ngambi enda ngeruga rampa menua,” ku iya.
Nya alai, seriris enggau teknologi kemaya hari baka Revolusyen Industri 4.0, iya minta pengawa nguna teknologi bejalaika pangku pengawa ngintu tayar ke udah dikena awak enda meri pangka ngagai rampa menua.
“Asil ari artikel ke dibacha aku, bisi orang kala nganchurka tayar ke udah dikena digaga nyadi palet getah lalu getah nya dikena sida ngetar jalai.
“Nya alai…nama utai ke patut digaga kita iya nya, gaga siti kilang ngumpul tayar ke udah dikena tu awak nyadi palet getah mit dikena ngaga jalai, ari nya tadi jalai raya kitai nadai ngeruang,” ku iya.
Tandu iya, pengawa nginsil SST betuju ngambika ACCCIS bejalaika pengawa inovasyen ngagai tayar ke udah dikena enggau ngurangka pengawa ngamahka rampa menua.
Dulu ari nya, ACCCIS nengah sebengkah pengawa penemuai basa ngagai Premier Sarawak bisi berandauka pasal isu chukai rega barang ngagai tayar impot ke balat nating belanja raban tauke tayar di nengeri tu.
Sama bisi datai, Sapit Premier Sarawak, Dato Sri Dr Sim Kui Hian enggau Sapit Sekeretari Perintah Sarawak (Operasyen) Datu Hii Chang Kee. – TVS
