SRI AMAN, 6 Feb: Kaban Kunsil Nengeri (ADUN ) Simanggang, Datuk Francis Harden Hollis bisi ngatur penemuai seraya gawa ngagai sekeda ejensi pengatur projek di bagi menua Sri Aman, empai lama.
Ku iya, tuju penemuai nya laban deka nemu status pemansang Projek Transformasyen Menua Pesisir (RTP) di sitak Kunsil Nengeri (DUN) Simanggang ti udah dikemendar lalu naka ni tikas projek nya udah dipejalaika.
Berindik ari nya, iya andal semua projek tu ulih tembu nitihka timpuh ke udah ditetapka ungkup pengelantang rayat.
Entara ejensi ti dilawa Harden iya nya Opis Kereja Raya (JKR) enggau Opis Entali Ai enggau Parit (DID) bagi menua Sri Aman.
Ku iya madah, dua ejensi tu ti bejalaika projek RTP enggau projek rayat bagi sitak DUN Simanggang.
Ba penemuai iya, Harden ngelalau ejensi pengatur projek chakah nentuka projek bejalai enggau lanchar ke pengelantang rayat di kandang menua nya.
“Aku ukai meresa ngenyit ngagai ejensi pengatur projek tang tuju pejalai aku deka nemu status pemadu baru bekaul projek RTP dibaruh kemata sida,” ku iya nengah sebengkah penerang, kemari.
Nangkanka ke nya, tuju bejalaika projek RTP tu mega sebagi ari inisiatif perintah Sarawak deka ngerapitka agi seraka pemansang di mengeri enggau menua pesisir.
Beduduk enggau nya, perintah sarawak bisi ngungkupka agih ngagai pengari rayat Gabungan Parti Sarawak (GPS) bejalaika projek pemansang di menua tu.
Ku iya, bagi taun 2022, bisi empat buah projek RTP dipejalaika di baruh ejensi JKR bagi menua Sri Aman enggau ungkus penyampau RM850,000.00 lalu ungkup DID bisi dua buah projek ti beungkus penyampau RM399,970.00 udah dipejalaika.-TVS
