KUCHING, 6 Feb: Pengawa nguna kereban digital ba jeman diatu dipeda majak ngerembai dalam semua sukut pengidup mensia, ti ulih meri empas ke positif enggau ke bukai.
Berebak enggau nya, Kelab Gerakan Pengguna Siswa Kolej Universiti i-CATS udah bekerejasama enggau Opis Menteri Pengawa Dagang Dalam Nengeri enggau Kos Pengidup Nengeri Sarawak udah ngatur Program Pemar Interaktif Penguna Digital dikena ngiri penemu sentang nagang ulah salah guna digital, lalu nyungkak pemereti ati ba raban nembiak.
Ku Direktor Pengawa Dagang Dalam Nengeri enggau Kos Pengidup Nengeri Sarawak, Matthew Dominic Barin, penumbuh Gerakan Pengguna Siswa ba semua universiti dipeda ulih mantu nyungkak pemereti enggau penerang chara betimpai mua begulai enggau raban nembiak sekula.
“Kitai udah ngatur sekeda aktiviti ti ngaul empas ari ulah salah guna digital tauka kitai mantaika sentang baka ni penguna jeman diatu ti pintar begunaka sebarang pelantar media massa tauka aplikasyen atas tali arus ngambika sida enda dikemula tauka ditipu laban diatu isu scammer tu, kes scam dalam tali arus tu, kelalu mayuh, lalu kitai deka mantaika ngagai raban penguna siswa, iya nya kitai udah numbuhka Gerakan Pengguna Siswa di Kolej Univeristi i-CATS.
“Gerakan Pengguna Siswa tu, kitai udah ngatur ba kolej universiti, chunto iya, Kolej Universiti i-CATS tu enggau tetiap kolej tauka U tu deka numbuhka siti kelab. Lalu kitai mega deka matau pengawa sida sereta bekerejasama enggau raban kolej tauka universiti dikena bejalaika mayuh aktiviti.
“Pemaik iya, kitai ulih nerenak pemereti ngagai raban nembiak sentang chara nguna digital. Kitai ulih ngajar sereta ngembing sida ngambika nyadi penguna ti pintar,” ku iya.
Kelimpah ari nya, ku Komiti Pengatur Program, Nur Suriayanti Gadiman madahka, program nya siti ari pengawa dikena ngangkat manah pengulih dalam dunya digital, tebal agi dalam raban nembiak seriris enggau tuju perintah Sarawak dalam nguna digital.
“Program tu dikena mantaika ngagai penguna tebal agi ngagai nembiak sentang guna e-dagang enggau chara nguna aplikasyen nyak ulih ngemuntangka pengawa mayar.
“Meri penerang bakani ejensi baka KPDN ulih mantu penguna nyema bisi nyadi isu baka isu hak penguna dalam pelantar e-dagang.
“Enti kitai nitihka tanggung pengawa Perintah Sarawak pan, sida lebih ngagai digital, nyadi aku arap mayuh agi organisasyen luar ulih meri awak enggau jalai ngagai nembiak sekula,” ku iya
Iya bejaku munyi nya rambau dirandau pengarang berita sepengudah Pengerami Pengawa Nutup Program nya di Mydin Vista Tunku.
Entara aktiviti ti diatur iya nya licha bekaul enggau pelantar e-dagang ari raban Pengawa Dagang Dalam Nengeri enggau Kos Pengidup Nengeri Sarawak enggau Pekit Nyumai Pemakai ke manah ungkup pengerai entara nembiak sekula sereta pengereja pengawa Kolej Universiti i-CATS. – TVS
