SIBU, 6 Feb: Program numbuhka kebun komuniti ti dipejalaika ba Kampung Bahagia Jaya Fasa 1 di Sibu dijangka deka meri pemaik ti ulih nyamin pemansut pemakai enggau nyungkak penatai pemisi ke baru ngagai pengani ke diau besemak.
Ku Pegawai Kanan Pemansang Komuniti Universiti Malaysia Sarawak (UNIMAS), Elina Jelani madah, program nya diatu berengkah dipejalaika enggau kerejasama ari UNIMAS enggau komuniti Kampung Bahagia Jaya ti udah ngemeranka sistem pengawa betanam betupi moden.
Iya nerangka, aktiviti program dipejalai nengah Program University Social Responsibility (USR).
“Program University Social Responsibility (USR) ti diatur ba Kampung Bahagia Jaya, Teku beserimbai enggau sumbang saran M (Pengerami) Dekan udah diatur kena 31 nyentuk 3 Februari 2023. Tuju besai program USR nya laban kitai deka mulaika baru ngagai komuniti, kitai deka mantu komuniti, nyadi entara aktiviti ke bisi ba USR Kampung Teku iya nya projek hidroponik enggau siti agi projek fertigasyen.
“Kelimpah ari dua projek tu, kitai bisi projek komuniti dikena meresika palan komuniti, lalu penyampau 35 iku ari M-dekan ke ngaul raban direktor institusyen, dekan-dekan sereta Sapit Mandal Chanselor Pemansik enggau Inovasyen Prof. Wan Hashim ti deka ngulu raban USR kitai sehari tu,” ku iya.
Nengah USR, ku iya madah, pengawa bekunsika penerang bekaul pengawa numbuhka sistem hidroponik enggau fertigasyen deka dipadah ngagai pengani ke bekaul dalam pengawa belajar sistem betanam betupi moden nya.
Kelimpah ari nya, USR mega deka nyendiaka siti chuan ngambika ulih nentuka program nya semampai diteruska.
Ku Tuai Komuniti Kampung Kuala Hilir Oya, Sulhi Mahdzar, konsep chara betanam betupi ti nguna chara hidroponik iya nya lebih muntang dikereja.
“Konsep tauka chara nanam sayur hidroponik iya nya enggau nguna paip, ke pemadu mudah laban kitai enti ngira ari sukut projek, kitai deka ngambi kira, keterubah iya, iya nya ari sukut kos, nya alai aku ngubah ari konsep ti dalam YouTube, ti udah diajar raban betanam betupi, ketegal pemansut produk ti manah, aku deka mengkang nguna sistem tu ti bekenaka kereban ti pemadu mudah.
“Nyadi aku dikangau tuai ba ditu dikena meri penerang mimit taja pan enda lama tang sida deka bulih langgur penemu dikena ngaga tauka nitihka utai ti udah dipejalaika aku laban aku udah ba bidang tu kenyau Mac 2020,” ku iya.
Iya mega ngelalau sida ti deka ngaul diri dalam bidang betanam betupi moden nya ngambika besabar sebedau meda asil ti deka dijapai sida.
“Kebendar iya, lebuh kitai ngaga projek kitai nadai terus mujur tekala nya, kadang-kadang kitai deka labuh empat kali, labuh angkat labuh angkat.
Nya alai, sepengudah aku empat kali enda mujur, enda berapa manah baka dikedeka aku, aku nguji chara ti kepenudi iya nya nguji nanam siti bansa sayur aja, lalu puji tuhan, kenyau dua taun tu aku bisi bulih penguntung ke manah,” ku iya nambah.
Program kebun komuniti nya mega seriris enggau aspirasyen perintah nengeri dikena mutarka isu pengelikun pemakai kelimpah ari deka nyadi bakul pemakai menua nyerumba taun 2023. – TVS
