BINTULU, 6 Feb; Mensia mayuh lebih agi peranak ke diau di rumah panjai diperansang belajar chara nyaga pengelikun enggau ngambi teladan ari pekara ke udah nyadi.
Ku Tuai Komisioner Raban Penyaga Orang Periman Malaysia (APM), Aminurrahim Mohamed, tuju tu ngambika mensia mayuh lebih sedia lebuh napi sebarang penusah ke enda disadang dudi hari.
Ku iya, pekara tu beguna bendar dikena komuniti ngambi atur tumu seraya ke nganti raban penyelamat datai ngesah.
“Entara isi program tu iya nya bekaul enggau chara genturung pendiau tu diberi latih nyelamat, madamka api, CPR, baka ni chara enti kitai engkelan enggau ke bukai.
“Kitai meda ba pun taun tu aja bisi dua penusah angus ti ngaul rumah panjai. Enti sema ejensi penyelamat baka bomba enggau raban terabai menua jauh ari rumah, nyadi chara ke pemadu manah iya nya komuniti nya empu patut lengkas (nyelamat). Tu mih tuju program Kampung Siaga 221,”ku iya.
Iya mansutka jaku nya rambau Program Kampung Siaga 221: Komuniti Kampung Berdaya Tahan Bencana (Skuad Komuniti Pertahanan Awam) ba Rumah Panjai Jackson Wan di Tubau, ensana.
Ku iya nambah, nyema peranak di rumah panjai disikap enggau penemu pugu bekaul bantu tasah deka ngemudahka agi pengawa sida lebuh napi penusah.
Nya alai, iya ngarap program nya ulih terus diatur dudi hari ke pemaik ngagai komuniti.
“Besai endar pengarap aku program tu dikemujur dikena negapka komuniti tauka siku-siku orang ngambi ke lebih besedia.” ku iya.
Nangkanka nya, Tuai Rumah Jackson Wan ngarap, nengah program nya, peranak rumah panjai ulih nyikap diri seraya begempung bejalaika tangkup pengawa diri nyema bisi penusah nyadi ba endur sida.
“Program tu beguna ngagai rumah panjai ngambika kitai bisi penemu mimit sentang chara nyelamat lebuh bisi penusah nyadi ba rumah,” ku iya.-TVS
