KUCHING, 4 Feb: Siku-siku orang enda ngira biak tauka tuai ke bisi penyiru enggau pengerindu belajar Jaku Iban tau bemalinka bup Sistem Jaku Iban Di Sekula.
Penulung Direktor, Opis Pelajar Nengeri Sarawak Graman Ringi madahka, bup nya ngundan sistem sepil ti standard, tegap enggau praktikal ke ulih dikena ba sebarang maya lalu diterima semua ke belajar enggau ngajar Jaku Iban.
Iya madahka, sistem sepil Jaku Iban di sekula tu ngembuan taga kediri empu nya alai sistem sepil tu mesti bepelasarka Jaku Iban ti nemban dikena dalam kurikulum sekula ke ulih ngayanka siti bansa, siti jaku ulih dititihka nyentuk ke jemah ila.
“Opis Pelajar Nengeri Sarawak kala ngeluarka bup ti diberi nama Sistem Jaku Iban Di Sekula ke ulih dimalin enggau dibacha ukai semina nembiak enggau pengajar ba sekula, tang mega sida ke gawa dalam media enggau pengarang bup ke bukai.
“Tuju nya dikena nentuka karang dalam Jaku Iban nya karang ke ngena leka jaku, sepil, atur ti standard sereta nyamai dibacha enggau dikenatika pemacha,” ku iya madah rambau dirandau pengarang berita TVS pengudah meri licha beserimbai enggau kus Jaku Iban empai lama.
Nangkan ke nya, Graman nerangka sistem sepil Jaku Iban di sekula tu ngembuan tukuh penulin kediri empu ti mandangka Jaku Iban endang ngembuan chuan diri lalu ukai beduduk ari chuan jaku bukai.
Taja pia, nitihka penerang ari bup nya, chuan sistem sepil Jaku Iban enggau Jaku Melayu bisi bekabih ketegal kedua-dua jaku tu ti sebilik dalam jaku seperugan.
Dalam sistem pelajar sekula, Jaku Iban agi ba tikas ti benung ngerembai mansang ari semua aspek.
Berindik ari nya, sistem sepil Jaku Iban digaga enggau naka ulih ngambika setipak enggau pemansang Jaku Iban kemaya hari tu ngena chara berinjauka jaku bansa bukai dikena napi segang pemansang dunya sains enggau teknologi.
