KUCHING, 4 Feb: Pengelantang sekula misyen di serata Sarawak terus diberi perati perintah Sarawak dalam taun tu.
Nya alai, Unit Pekara Pengarap Bukai (UNIFOR) udah ngagihka geran sepenyampau RM14,055,120 ngagai 117 buah sekula misyen di Kuching, Sibu enggau Miri.
Chek geran nya diserahka Sapit Premier Sarawak ke mega menteri ti nyaga UNIFOR, Datuk Amar Douglas Uggah Embas ba opis iya empu, lebuh Hari Lima.
Uggah nyerahka chek sepenyampau RM5,905,530 ngagai 49 buah sekula ba baruh Keuskupan Anglikan Kuching ti diarika Menteri Pelajar, Inovasyen enggau Pemansang Pengelandik Datuk Roland Sagah Wee.
Nangkan ke nya, 31 buah sekula ba baruh Keuskupan Agung Roman Katolik Kuching nerima chek sepenyampau RM3,779,520 ti diarika Sapit Menteri Kaunsil Kandang Menua enggau Pengawa Berumah, Datuk Dr Penguang Manggil.
Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan ngarika 23 buah sekula ba baruh Keuskupan Roman Katolik Sibu nerima chek sepenyampau RM2,716,530.
Sida bukai ke nerima chek sepenyampau RM826,770, Menteri Industri Pemakai, Komoditi enggau Pemansang Kandang Menua Dato’ Sri Dr Stephen Rundi Utom ti ngarika tujuh buah sekula ba baruh Methodist Chinese Annual Conference (SCAC).
Entudi ke nya, tujuh buah sekula ba baruh Keuskupan Roman Katolik Miri mega diungkupka turu sepenyampau RM826,770 ti diarika Menteri Pengangkut Dato Sri Lee Kim Shin.
Direktor UNIFOR, Datu Jack Aman mega bisi ngulu program nyerahka geran nya ngagai penerima.
Dulu agi ari tu, kena 1 Februari tu tadi, Â Premier Sarawak Datuk Patinggi Tan Sri Abang Johari Tun Openg mega bisi nyerahka chek sepenyampau RM944,880 ngagai lapan buah sekula di Bagi Menua Kapit. -TVS
