BINTULU, 31 Jan: Perintah Sarawak deka neruska kerejasama enggau Petroliam Nasional Berhad (Petronas) nyadi pengempu entaruh besai penyangkai kapal enggau ngintu Penyangkal Kapal Bintulu.
Premier Sarawak, Datuk Patinggi Tan Sri Abang Johari Tun Openg madah, kerejasama nya betuju nyapai sekeda pekara bukai iya nya ngemansangka pekara dagang strategik kededua raban, nyapai tuju pemansang ke meruan, meri servis ke lebih manah ngagai sitak menua pesisir enggau raban ke bekaul sereta nentuka pemansang enggau pemujur semampai bejalai.
Ku iya, pengandal deka terus bekerejasama enggau Petronas nya bepelasarka asil rikod pengawa ke manah serikat nya ke nyengala nyulut dalam ngatur enggau ngintu Penyangkai Kapal Bintulu ngelama tu.
“Ari komitmen ke sama enggau kerejasama ke manah entara Sarawak enggau PETRONAS, Penyangkai Kapal Bintulu deka bepeluang ngaga transformasyen endur nempa penyangkai kapal tauka hab pengkalan besai ba rantau Asia Pasifik.
“Aku meransang raban pemegai entaruh, lebih agi Petronas, enggau Kaunsil Direktor sereta Raban Pengatur Pengawa Bintulu Port Holdings Berhad (BPHB) terus nyukung inisiatif pemansang besai tu ke pemaik semua raban ke bekaul,” ku iya.
Iya madah munyi nya maya bejaku ba Pengerami Makai Lemai Ngintu Ulang Taun ke-10 Penyangkai Kapal Industri Samalaju (SIPSB) ke diatur ba sebuah hotel tebilang ditu, malam tadi.
Ungkup penemu, Bintulu Port Sdn Bhd (BPSB) ti diberi kuasa tauka hak kena 1 Januari 1993 ngintu Penyangkai Kapal lalu ngemataka Perintah Sarawak ngempu 39.7 peratus saham, udah nya Petronas enggau Serikat Kapal Entarabansa Malaysia Berhad begulai enggau pemegai 30.8 peratus saham, sepenyampau 70.5 peratus ari saham dikeluarka BPHB baka ti udah dirintaika ba Bursa Malaysia.- TVS
