KANOWIT: Projek ngaga Jalai Ngungun/Jagau sepemanjai 10.8 kilometer diatu benung dikereja.
Lembaga Pembangunan Koridor Wilayah (RECODA), sebengkah ejensi perintah Sarawak ti megai Ejensi Pemansang Hulu Rajang (URDA) madah, jalai belakin nya deka disambung ngagai Nanga Nirok enggau Nanga Bat sepemanjai Sungai Ngemah.
“Projek tu mungkur pengawa ngaga dua jematan ‘Bailey’. Kereja meresa enggau mansik struktur tanah mega deka tembu lalu kereja begaga lebih agi meresi taba udah dipejalai,” ku RECODA madah dalam siti penerang ba laman Facebook.
“Projek jalai tu dipelaba tembu ba taun baru ila.”
Projek jalai nya keterubah diperambu ari penemu ti dipansutka Menteri Besai Malaysia ke lama, Datuk Seri Najib Tun Razak, lebuh iya nemuai ngagai Rumah Pengulu Ugap Seribu ba Nanga Tada, Kanowit, kena bulan Februari 2010.
Nitihka penerang RECODA, projek jalai nya dikereja dalam dua renggat. Renggat keterubah jalai nya benung digaga ari Nanga Bat ngagai Sungai Pra.
Pampas tanah mega udah dibayar ngagai sida ke ngempu tanah.
Renggat kedua ditampung ari Sungai Pra ngagai Baluh, Serait, Sugin, Entungun, Wong Entekai, Kapit nyentuk ngagai Nanga Jagau.
Penembu jalai nya ila deka ngemuntangka agi pemindah 21 buah rumah panjai ba Nanga Jagau enggau 20 buah rumah panjang ba sepemanjai Jalai Sungai Ngemah.
Nanga Jagau sebengkah kandang endur pengentap pendiau ti ngena jalai balak. Ngelama tu, orang ke diau dia ketebal agi ngena jalai ai tauka sungai enti deka nurun ke pasar.
