KUCHING, 29 Jan: Projek dibaruh Ejensi Pemansang Bagi Menua Betong (BDDA) deka berengkah dipejalaika enda lama agi, ku Sapit Premier Sarawak, Datuk Amar Douglas Uggah Embas
Iya ke mega Kaban Kunsil Nengeri (ADUN) Bukit Saban madah, rintai projek pemansang ke udah disetuju raban komiti BDDA nya udah dibantai ngagai opis ke bekaul enggau udah dikemendar Premier Sarawak, Datuk Patinggi Tan Sri Abang Johari Tun Openg.
Berebak enggau nya, Uggah ngarap projek di baruh BDDA tu ulih digaga lengkas nitihka timpuh ke udah ditetapka.
“Kami mega udah meri rintai projek tu ngagai Opis Kereja Raya (JKR), Opis Entali Ai enggau parit (DID), DAK enggau Opis Tanah enggau Survei ti besangkut paut bejalaika projek tu,” ku iya.
Uggah mansutka jaku nya rambau dirandau pembrita TVS senentang pemutus rintai projek di baruh Agensi Pemansang Bagi Menua Betong (BDDA) ke dibantaika raban komiti agensi nya ngagai Premier Sarawak Datuk Patinggi Tan Sri Abang Johari Tun Openg apin lama pengudah ngulu Pengerami Ramah Tamah Gong Xi Fa Cai 2023 Serakup Tiong Hua ba dewan mensia mayuh Spaoh lemai Hari Enam.
Nangkan ke nya, Uggah meransang rayat terus meri sukung penuh ngagai Gabungan Parti Sarawak (GPS) ba sebarang aja program ke bisi diatur perintah.
Ku iya, sukung ari genap iku rayat tu beguna bendar dikena nentuka langgur pemansang ulih dikemujur lalu meri penguntung ngagai rayat.
Pekara tu senutuk enggau juluk perintah ti deka nyapai status menua maju manggai taun 2030.
“Aram mih kitai bekerejasama ngiga jalai baka ni deka ngangkatka tikas pengidup rayat laban tuju Premier kitai (Datuk Abang Abang Johari Tun Openg) iya nya deka ngemansangka nengeri Sarawak awak ke ulih nyapai status nengeri maju manggai taun 2030,” ku iya.
Sama bisi datai, Kaban Parlimen Betong, Dr Richard Rapu, Ex-Kaban Parlimen Betong, Datuk Robert Lawson Chuat sereta disempulang tuai raban bansa ke bukai. – TVS
